Jowai, Ïaïong 18
Ka Joint Action Committee (JAC) ka la pynbna ïa ka rai ban pynlong da ka jingïakhih kaba khlem buh por ne ‘Indefinite Strike’ ban khanglad ïa ki trok kit dewbilat kit ‘Clinker’ na Lumshnong sha Assam ka ban sdang naduh ka 22 tarik Ïaïong ha Tuber Tahkhniang, East Jaiñtia Hills District.
Ïa kane ka rai ka JAC kaba kynthup ïa ka Jaiñ-tia Hills Truck Owner’s Association (JHTOA), Meghalaya Commercial Truck and Driver Asso-ciation (MCTDA) bad All Jaiñtia Cement and Clinker Transporter’s Association (AJCCTA) la shim ha ka jingïalang kaba la long ha ka 17 tarik Ïaïong ha Phramer.
Ka JAC da kawei ka sur ka la rai ban pynlong ïa ka jingïakhih kaba khlem buh por halor ka jingbym patiaw ki kar-khana pynmih dewbilat ïa ka dor bai kit bai bah kaba ka JAC ka la dawa T.1500 shi ton.
Halor katei ka bai kit bai bah, u Chairman, Bah Biangshwa Shylla, u la ong ba ka JAC ka la dep ban aiti da ka shithi sha ki karkhana pynmih dewbilat ba don ha East Jaiñtia Hills District bad ka la dep ruh ban pynkynmaw sha ki hynrei na ka liang kitei ki karkhana pynmih dewbilat kim shym la patiaw ïa kane ka dor bad ka JAC kam banse ban pynlong da ka ‘Indefinite Strike’ ban khanglad ïa baroh ki kali kit dewbilat kit ‘Clinker’ katba kim pat lah ban pdiang ïa kane ka dor.
Kane ka jingkhang kali kan long tang ïa ki kali kiba kit na Lumshnong sha Assam.
Kumta la kyrpad ïa ki trai trok ban ïa mih paidbah ha katei ka sngi bad kyrpad ruh ïa ki paidbah ban ai ka jingkyrshan ïa ka jingdawa jong ka JAC.
