Shillong, Ïaïong 18
Ki nonghikai na ki skul bapher-bapher na ki thaiñ West Khasi Hills District kiba la pyndep ïa ka D.EL.ED na Sibsingh Memorial Government Higher Secondary School ha ka 17 tarik u Ïaïong 2025, ki la leit ban ïakynduh ïa u Commissioner & Secretary ka Tnat Pule Puthi ka Jylla, Vijay Kumar Mantri, IAS, ban ai da ka jingthoh bad pynsngew ha u ha kaba ïadei bad ka jingbym ïoh shuh jong ki ïa ka resol kaba shai wat hadien ba ki la pyndep ïa ka D.EL.ED.
Haba kren sha ki lad pathai khubor, u Bah Shembor Langrin uba dei uwei napdeng kitei 29 ngut ki nonghikai kiba la pyndep ïa ka D.EL.ED na Sibsingh Memorial Government Higher Secondary School Study Centre ha Nongstoiñ u la ïathuh ba kine ki nonghikai ki la pynrung kyrteng ïalade na ka bynta ka prokram D.El.Ed kaba ar snem kaba la pynlong da ka National Institute of Open Schooling (NIOS) bad ha ka eksam kaba nyngkong ki la ïoh ïa ka resol kaba biang hynrei ha ka sien kaba ar ki la ïoh ïa ka resot kaba ai ba ki khlem leit thoh ïa ka eksam bad ki mark na ka bynta ki Tutor Marked Assignments (TMAs) ruh kim don.
“Baroh 29 ngut, ngi dei ki nonghikai ba dang trei kiba la bthah da ka tnad ban shimti ïa ka prokram D.El.Ed na ka bynta ka samoi jong u snem 2015-2017 bad ha u snem ba nyngkong jong ka jinghikai, ngi la ïoh ïa ki resol khlem kano-kano ka jingeh hynrei ki jingeh ki la mih ha ka snem kaba ar, kaba la pynslem bad khatduh la pynjlan ban kynthup ïa ka por naduh u snem 2016 haduh u snem 2018. Ha kaba khatduh ngi la pyndep ïa ka snem kaba ar ha u Jylliew jong u snem 2019, hynrei ynda la pynmih ïa ka resol, ki mark hapoh jong ngi khamtam eh ki Tutor Marked Assignments kim don”, ong u Bah Shembor.
U Bah Shembor u la ong ba katei ka jingeh kam dei na ki nonghikai namar ki nonghikai ki la ai lut ïa ki ‘assignment’ jong ki kumba la bthah bad ong ba ka jingbym ïoh ïa kitei ki mark ka la wanrah ïa ka jingkhuslai ïa ki nonghikai, namar ka syrnot D.El.Ed ka long kaba donkam eh na ka bynta ban bteng ïa ka kam jong ki kum ki nonghikai.
Shuh shuh u la ong ba na ka liang u Commissioner Secretary u la kular ban shimkhia halor kane ka kam bad u la phone ruh sha u Coordinator ban kylli halor kane resol jong kitei ki nonghikai.
