Shillong, Ïaïong 18
U Nongïalam ka National People’s Party (NPP), Bah Sniawbhalang Dhar u la ong ba ki paidbah ka ri lum Jaiñtia kin sa ai da ka ‘Red Card’ ïa ka Voice of the People Party (VPP) ha ka ilekshon MLA 2028.
U la ong ba ka jingleit jong ki nongïalam ka VPP man la ka por sha thaiñ Jaiñtia ka dei namar ka jingsheptieng ïa ki paidbah kiba la dep ba ai ‘Yellow Card’ ha ka ilekshon MDC dang shen.
“Phi tip balei ba ki leit man ka por sha ri lum Jaiñtia? Ka dei namar ki sheptieng ïa ki paid Jaiñtia ba ngi la dep ai ‘Yellow Card’ ha ka ilekshon MDC ba dang shu dep, bad ngin sa ai sa ka ‘Red Card’ ha u 2028,” ong u Bah Dhar.
U la ong ba ka VPP ka la jan ïoh ‘Yellow Card’ wat ha ri lum Khasi ruh namar na baroh 29 seat ba ka jop ha ka ilekshon MP, ka la jop pat tang 17 seat ha ka ilekshon KHADC.
“Ka long kumba la ïoh ‘Yellow Card’, na kata ka daw ki la duh thiah duh dem bad ki bunkam ha ki jingkren bym don nongrim,” u la ong shuh-shuh.
Kane ka jingkynthoh une u Nongïalam ka NPP uba dei u Symbud Myntri Rangbah ka Jylla, ka la mih hadien ba u President ka VPP, Ardent M Basaïawmoit u la byrngem ban leit rah ïakren sha ka Election Commission of India (ECI) ba kan peitngor bha ïa ka ri lum Jaiñtia ha shwa ka ilekshon MLA 2028.
Kham ha shwa ka VPP ka la phah ruh da ka shithi sha u Chief Secretary, ha kaba ka la dawa ban don ka jingtohkit ba laitluid halor ka jingbym ïaid beit ïaid ryntih ka ilekshon ba dang shu dep shen sha JHADC.
Ka VPP ka la jop tang 8 ngut ki MDC ha ka ilekshon JHADC, katba ha KHADC ka la jop 17 ngut.
Haba kynthoh shuh-shuh ïa ka jingsahnud ka VPP ïa ka ilekshon MDC sha JHADC, u Bah Dhar u la ong ba ka VPP ka dei ban burom ïa ka rai ba la ai da ki paidbah ka ri lum Jaiñtia bad ba kam dei ban hikai skul ïa ka ECI kumno kan pynïaid ïa ka ilekshon.
“Da ka jingjop ha JHADC, kam mut ba ka NPP ka la pyndonkam bakla ïa ka bor bad kam mut ruh ba ka VPP ka jop ïa ka ilekshon sha KHADC namar ki la pyndonkam bakla ïa ka bor. Kaei kaba kongsan ka long ba ngi dei ban burom ïa ka rai jong u paidbah. Ban ong ba ngin leit sha ka ECI, nga sngew phim donkam ban hikai ïa ka ECI kaei kaba ka dei ban leh bad kaei ka bym dei ban leh,” la ong u Bah Dhar, da kaba kheiñ ruh ba kane ka jingleh ka VPP ka dei namar ka jingsheptieng ban rem ilekshon.
