Nongpoh, Ïaïong 18
Ka JN Suzuki, ka showroom kaba die ïa ki kali ar shaka jong ka kompeni Suzuki Motorcycles India ha ka Sngi Ba-ar ka la ïoh ban pynïar shnat bad plie ïa ka showroom ba thymmai jong ka harud ka surokbah National Highway 6 kaba dang hap ha ka shnong Mawdiangum, Nongpoh, Ri Bhoi District.
Ïa kane ka showroom ba thymmai jong ka JN Suzuki, la plie paidbah da u Bah Andrew L Myrthong, Assistant Commissioner ka Ri Bhoi District ha ka jingïadon lang ka Kong Pristymai Jyrwa Nongsiej, trai jong ka showroom, nalor ki bahaïing bahasem, ki nongtrei, ki nongñiah ar shaka na ka nongbah Shillong lem bad kiwei kiwei ki nongshah khot sngewbha.
Ha kane ka sngi kum shi bynta jong ka jingkmen ïa ka jingïoh lad ban plie paidbah ïa ka showroom, la pynlong ruh ïa ka jingduwai ban ai burom sha u Blei halor ki jingkyrkhu ki jong u kaba la pynbud pat da ka jingot ïa u cake.
U Bah Andrew L Myrthong haba kren ha kane ka sngi shwa ban khap ïa u ribbon ban plie paidbah ïa kane ka showroom, u la ai kitbok-kitrwiang ïa ka trai ba kan lah ban ai ïa ka jingshakri kaba paka, ba kan nang lah ban kiew shaphrang bad khamtam eh ba kan ai ïa ka jingshaniah ïa ki paidbah kiba wan rung ha kane ka showroom.
Haba ïakren bad ka Kong Pristymai Jyrwa Nongsiej, ka la ïathuh ba kane ka showroom kaba la plie ha Nongpoh kam don jingïapher satia na kaba la don lypa ha ka nongbah Shillong bad pyntip ha kane ka showroom yn buh ïa ki kali ar shaka kiba kynthup ïa ki Access, Avenis, Gixxer bad VoStorm SX ha ki rong bapher bapher.
Ka Kong Nongsiej ka la ïathuh ruh ba lyngba kane ka showroom, yn ailad ïa ki nongthied ban shim da ka ram kaba hap ban siew bnai lyngba ki nongbei tyngka lane ban thied beit da ka tyngka pliah ruh katkum ka jinglah ka jong ki paidbah nongthied.
Ka Kong Nongsiej ka la ïathuh nalor kitei haneng, ka jingmyntoi kaba ki nongpyndonkam ïa ki kali ar shaka jong ka kompeni Suzuki Motorcycles India ki ïoh, ka dei halor ka jingduna bam umphniang ka jong ki, ha kaba tang shi litar ka petrol lah ban ïaid haduh kumba 56 kilometer.
Lyngba ka jingplie ïa kane ka showroom kaba thymmai, ka long ruh kum shi bynta ka lad ïohkam ïohjam ïa ki khun samla jong ka thaiñ Nongpoh ha kaba na ka liang ka Kong Nongsiej ka la ïathuh kumba long mynta hi, ki bun na ki samla kiba trei ha kane ka jaka ki dei kiba na ka thaiñ Nongpoh hi.
