Nongstoiñ, Ïaïong 18
Ha ka Sngi Balang jong ka taïew, ki nongmihkhmat na ki School Managing Committee ba kynthup ïa ki Headmaster/Headmistress na ki Skul Secondary/ Higher Secondary, SSA bad Adhoc School kiba pynïaid da ki Mission, NGO, Skul Shimet bad kiwei-kiwei, ki la wan ban ïashim bynta ha ka jingïalang kaba la la pynlong da ka Meghalaya Schools Welfare Development Association – Sengkmie ha Ri Khasi Free Morning School, New Nongstoiñ, West Khasi Hills District.
U Bah H.M. Marbaniang, President ka MSWDA haba kren ha ki lad pathai khubor hadien katei ka jingïalang u la ong ba ha kane ka jingïalang ka la ïa phylliew jingmut bha halor san tylli ki mat ïa kaba la buh ha ka dorkhas bad kaba la dep ruh ban aiti sha u Myntri ka tnad pule-puthi ka Sorkar Jylla ïa kaba la ai kopi ruh sha u Myntri Rangbah ka Jylla bad kiwei-kiwei.
U Bah Marbaniang u la ong ruh ba ha kane ka jingïalang ka la pynshai biang ïa kaei kaba la mih ha ka jingïakren bad u Myntri ka tnad pule-puthi ha ka 10 tarik mynta u bnai, ha kaba ka jingïalang ka ban jur ba na ka liang u Myntri Rangbah u dei ban shim ïa ka rai kaba donkam na ka bynta ka jingbha jong ki skul baroh bad u la ong ruh ba na ka liang ka seng kan sa ïakynduh ha ki taïew ban wan ban buddien ïa ki san tylli ki mat ïa kaba la dep ban pynshai paidbah.
U la ong ruh ba nalor san tylli ki mat, ka don ruh ka mat kaba dang ïakren ha kaba ïadei bad ki skul SSA, bad kumba la ïohi ba ka jingpan bad shimti ïa ki skul SSA kaba la pynïaid da ki shimet, da ki Mission, ki NGO bad kumta ter-ter ban aiti noh sha ka Management, sha ka tnad pule-puthi. Halor kane, na ka liang ka seng, ka la ïakren sani bha halor ki skul ki bym kwah ban aiti ïa ka jingpynïaid sha ka tnad pule-puthi namar ki dei ki skul ba la seng hi da ki naduh ba sdang mynshuwa kumta ter-ter.
“Halor kane kawei ka mat kaba ngi kwah ban tyrwa bad ban ïakren mynta bad ka tnad pule-puthi na bynta ka jingithuh ïa kine ki skul namar ba kaei kaba ngi, ngi lap, kiba bun ki skul SSA ki dei ki bym shym ïoh ïa ka jingithuh wat la kane ka jingithuh ka long kaba donkam bha lada ngi ïa phai katkum ka RTE,” ong u Bah Marbaniang.
Shuh shuh u la bynrap ba ha katei ka jingïalang la shim ïa ka rai ban ai ka jingthoh sha ka tnad pule-puthi ka Sorkar Jylla ba kan bthah sha baroh ki DESEO lane SDSEO ban kin leh ïa kane ka bynta jong ka jingithuh ïa ki skul khnang ba kan pynskhem, kumjuh ban pyntikna ïa ki skul khnang ba lashai lada ka Sorkar kam treh ban pyntrei shuh ïa ka SSA ha ki skul lane ka SSA kam don shuh, kumba long mynta, ka tnad pule-puthi kam ithuh kyrpang ïa ki skul jong namar ba ki skul kiba ïoh jingïarap na ka SSA ki don tang hapoh SEMAM, State Education Mission Authority Meghalaya, bad dei na kane ka daw ka seng ka kwah ba ki skul ki dei ban long kiba la ithuh da ka tnad pule-puthi.
