Shillong, Ïaïong 18
Ka Sorkar Jylla kan dang bishar bniah biang ïa ka aiñ rew Meghalaya Resi-dents Safety and Security Amendment (MRSSA), 2020 ba la pynphai noh da ka Ministry of Home Affairs (MHA) ka Sorkar Pdeng.
Katkum ka jingong u Symbud Myntri Rangbah ka Jylla ba khmih ïa ka tnat Pohïing, Bah Prestone Tynsong, ka Sorkar India haba pynphai ïa kane ka aiñ rew ka la buh jingkylli ba kane kam dei ban ktah, khamtam ba ka Jylla Meghalaya ka dei kaba ki nongshong shnong jong kiwei ki Jylla ki hap ïaid lyngba (Transit State).
“Ka Sorkar India ka sngewkhia ïa kane ka Bill, ba kan ym ktah ïa kiwei ki nongshong shnong ba ïaid lyngba ka Meghalaya. Mynta ka shong ha ngi kumno ban pynbeit,” u la ong.
Haba pynpaw ba ka Sorkar Jylla kan dang hap ban ïamir sani bha halor kane ka aiñ ba kan ïoh ïa ka jingmynjur, u Bah Prestone u la ong ba lehse ïa kane ka mat lah ruh ban ïakren ha ka jingïalang jong ka All Party Committee (APC) kaba la thaw ban ïakren halor ka jingpynïasoh lynti rel ha ka Jylla.
“Lehse ha ka All Party Committee kin sa bun ki mat ba ngin ïakren,” u la ong.
“Na ka liang ka Sorkar ngin eksamin bha ïa kane. Ka dei ban don da kawei pat ka lynti na ka bynta ka bit ka biang bad ka jingïada ba pura ïa ki paidbah nongshong shnong ka Jylla Meghalaya jong ngi,” la ong u Symbud Myntri Rangbah.
Lah ban pynpaw hangne ba ka Sorkar India lyngba ka Ministry of Home Affairs (MHA) naduh u Naiwieng, 2023 ka la pynphai biang ïa ka Meghalaya Residents Safety and Security Amendment Bill (MRSSAB), 2020, da kaba kdew katto-katne tylli ki daw, kynthup ïa ka jingpynïeng ïa ki khyrdop ba peit ïa ka rung ka mih ki briew nabar Jylla (Entry-Exit Point) ba la kdew ha ka Bill ba la mynjur da ka ïingdorbar thaw aiñ ka Jylla.
Ha ka shithi kaba la phah da ka MHA ha ryngkat bad ka Bill ba la pynphai biang, la bthah ïa ka Sorkar Jylla ba ka dei ban peit bniah biang ïa kane ka Bill. Nalor kane, ka MHA ka la buh ruh ïa ka jingbthah ba kino-kino ki Bill ne ki Act kiba la shna da ki Sorkar Jylla kim dei ban ïa pyrshah lane long pyrshah ïa ka Aiñ ba la mynjur da ka Parliament.
