Shillong, Ïaïong 20
U Symbud Myntri Rangbah ka Jylla, Bah Prestone Tynsong u la ong ïa ka Voice of the People Party (VPP) ba kan bha ban shim bynta ha ka jingïalang ka All Party Committee (APC) ban ïasyllok lynti rel bad ban kren ïa kaei ka jingkwah jong ki.
“Nga shu ïohi ha ki kotkhubor ba ki ong kim kwah bad kim treh ban ïadon bynta. Nga ïohi ba ki ong, ka jingbym treh ka long ba ngi kwah ban wan shwa ka ILP. Lada phi kwah lei ïa kata ka bha ba phi wan keiñ ban shim bynta ha ka jingïalang ka All Party Committee, kren ïa kata ba ngi kwah ban ïoh shwa ïa kata bad sa ïakren ïa ka phang jong ka lynti rel,” la ong u Bah Prestone.
Shuh shuh haba kynthoh ïa ka jingkyntait ka VPP ban don bynta ha ka APC, u Symbud Myntri Rangbah u la ong um lah sngewthuh kaei jingmut jong ki ban ym trei don bynta ha ka APC.
“Ngam tip kaei ka rukom pyrkhat jong ki. Hynrei, ha ka jingsngew jong nga, ngi na ka liang ka Sorkar ngi shai haba ngi khot ban ïakren ïa kane ka mat bad da kaba ngi ïakren ngin sngewthuh shuh-shuh kaei ka jingmut jingpyrkhat jong kiba bun balang ha kaba ïadei bad kane ka projek,” u la ong.
U la ong ba ka jingthmu jong u Myntri Rangbah ban thaw ïa ka All Party Committee (APC) ka long na ka bynta ban ïasyllok bad ai jingmut na baroh kiba don bynta, la yn pdiang ne ynnai ïa ka lynti rel ha ka thaiñ Khasi-Jaiñtia.
Haba pynshai ïa ka jingmut ka Sorkar ha kaba ïadei bad ka lynti rel, u Symbud Myntri Rangbah u la ong, “Ngi, ngi hap ïaid ryngkat bad u paidbah.”
U la ong ba kumba ka long mynta ka jingïakren ki briew ka long ba lada wan ka lynti rel, sngew baroh kiwei ki jaitbynriew na shabar kin wan sah lut hapoh Meghalaya.
“Ha ka jingsngew jong nga kam dei kumta. Lada tang shu wanrah ïa ka lynti rel la wan sah lut hangne te, nga ruh nga sngew ban ong ba ngim donkam ngim kwah,” la ong u Bah Prestone, ha kaba u la bynrap shuh-shuh ba kam long kaba bha ban shu ïalam bakla namar ka Sorkar ka kwah ban ïoh ïa kawei ka sur kaba don jingmut ïa kaba bha tam.
“Na ka bynta ka bit ka biang u paidbah Meghalaya, kano kaba bha tam ïa kata ngin shim,” u la ong.
