Shillong, Ïaïong 20
Ki pulit ki la ïoh ban kem noh ïa ar ngut ryngkat ban kurup ïa ka pisa thok kaba long da ki phew hajar tyngka.
Katkum ka khubor na ki pulit la ong ba halor kane, ki pulit kiba la ïoh jingtip ha ka sngi Balang, ha ka por kumba 2:10 baje mynstep ki la ïoh kem ïa ar ngut ki nongshong shnong jong ka Jebalgre kaba ha South West Garo Hills ïa kiba la tip kyrteng kum u Rambera R Marak, 25 snem bad u Kandit D Sangma, 30 snem ka rta.
Na kine ar ngut, ki pulit ki la ïoh kurup T.36,000 ki lut pisa thok jong ka ri India ‘Fake Indian Currency Notes’. Ha ka jingtohkit, la lap ba kine ar ngut ki la leit sha ïing jong uwei u briew ba la tip kyrteng kum u Tangrik M Marak ha ka shnong Jebalgre ha kaba ki la ïasam ïa ka pisa thok.
Hadien ka jingphla jong kitei ar ngut, ki pulit ki leit khynra ïa ka ïing jong u Tangrik M Marak ha kaba ki la ïoh kurup sa T.73,000 hajar ka pisa thok.
Shwa ba ki pulit kin poi, u Tangrik M Marak u la phetrieh ban lait na ka jingshah kem ha ki pulit.
Kumta na ka liang ki pulit ki la pynrung mukotduma halor kane bad ka jingtohkit ka dang ïaid shakhmat pyrshah ïa kitei ar ngut kiba la shah kem khnang ban lap ksai naei ki ïoh ïa ki pisa thok bad ha kajuh ka por ki pulit ki la pynlong ïa ka jingthwet kaba jur ban ïoh kem sa ïa u Tangrik Marak.
