Mangsang, Ïaïong 20
Ka Achik State People’s Forum (ASPF) hadien ka jingleit jngoh ïa ka shnong Nongkongkil bad Moronga ha ki thaiñ Mangsang jong ka East Garo Hills, ka la ñiew ba ki jingkam jong ka KHADC ba katei ka thaiñ ka hap hapoh ka jingpeit jong ka (KHADC), ki long ka bym lah ban pdiang bad kiba dei ban pynrem.
Ki dkhot ka ASPF ki la leit jngoh ïa katei ka thaiñ ha ka 17 tarik u Ïaïong ha kaba ki la ïakren ruh bad ki trai shnong jong ki ar shnong – ba la kam da ka KHADC.
“Kine ki shnong ki dei kiba la kam be-aiñ ba ki dei shi bynta jong ka KHADC. Ha kane ka jingleit jngoh jong ngi, ngi la ïakynduh ïa ki Lasker bad ki nongshong shnong ka Nongkongkil bad Moronga. Ka long kaba donkam ban ban-jur ba ki shnong Mogru, Nongkongkil bad Moro-nga ki hap hapoh ka jingpeit jong ka Garo Hills Autonomous District Council (GHADC),” ong ka General Secretary, ka Bertina Marak.
Kham ha shuwa, ki nongshong shnong na ka thaiñ Mangsang, kynthup ïa ki kynhun seng ne CSO ki la kynthoh tyngeh halor ka jingong jong ka KHADC, ha ryngkat katto-katne ki jingkam ba ka jaka kaba la bat be-aiñ, ka don ïa ka jingheh kaba palat 10 km hapoh u pud u sam jong ka GHADC.
“Katkum ka histori, kine ki shnong ki long ki bynta ba kongsan jong ka Ri-lum Garo, ba la pynshisha da ki kot ki sla kiba biang lem bad ki pud ki sam. Ki nongshong shnong ki la pyndonkam ïa ka hok thep ‘vote’ jong ki hapoh ka GHADC naduh ba la seng ïa ka khlem kano-kano ka jingpynthut,” la bynrap ka ASPF.
Haba ïeng skhem ha ka nongrim halor kane ka bynta, ka ASPF ka la pynpaw ba kan ïada ïa la ki jaka la ka long ha kano-kano ka rukom khamtam ba ka Ri-lum Garo ka don ïa ki pud ki sam kiba la pruid shai bad ym donkam ban pynmih ïa ki kynrum-kynram kiba khlem da donkam.
“Kane ka lah ban pynmih ïa ka jingïakynad bad jingshun hapdeng ki ar jaidbynriew kiba la ïa im-suk im-saiñ naduh ba la thaw ïa ka Jylla. Ngi kyrpad ïa ka jingtuklar jong u Myntri Rangbah, u Conrad Sangma ban pynbeit kloi ïa kane ka kam namar ka lah ban wanrah ïa ka jingbymsuk bad jingbym ïasngewthuh jingmut hapdeng ki ar jaidbynriew kiba la ïa imlang hapdeng ka suk ka saiñ,” la pynsngew ka seng.
Shuh shuh ka la kyntu ïa u Myntri Rangbah ban sdang ïa ka jingsaiñ dur kaba bniah katkum ka juk stad ‘digital’ ba mynta khnang ban buh dak ïa ki pud ki sam jong ka GHADC bad ban pynsuk ha ka ban ithuh ïa kino-kino ki jingwan kyntur pud hapoh ka jaka jong ka GHADC, khamtam hajan ki khappud bad ka KHADC lem bad ka Assam.
