Shillong, Ïaïong 20
Ki pulit ka Meghalaya ha ka jingtohkit kaba la pynïaid shakhmat halor ka jingdon jong ka kynhun kaba pynrung tuh ïa ki nong Bangladesh ban leit wad kam shaduh Mumbai, ki la ïoh ban kem noh ïa 3 ngut ki snar ne kiba la tip ruh kum ki ‘Kingpin’.
Kine ki briew kiba la shah kem ki dei kiba donkti ban pynrung tuh, pynshna ïa ki kot ki sla thok bad ki bank account thok ïa ki nong Bangla-desh ha kylleng ka Ri India.
Katkum ka khubor na ki pulit la ong ba ka jingtohkit ba la lamkhmat da u IPS Probationer bad Assistant SP Ashu Pant bad btin lynti da u Special SP Vivekanand Singh Rathore, ka la pynpaw pyrthei ïa ka kam thok kam shukor kaba jur ba ïadei bad ka jingpynrung briew beaiñ sha kylleng ki bynta jong ka ri lyngba ka Meghalaya, da kaba leh thok ïa ki kot ki sla, ki bank account da ki nong Bangladesh kiba pynïaid ïa kane ka kam.
Ka jingkhynra ïa kane ka kynhun ka la sdang naduh ka 14 tarik u Rymphang 2025, hadien ba ki pulit ki la ïoh khubor ba thikna ïa ka jingdon jong ka kynhun ki nong Bangladesh kiba ju wan kiew na Guwahati sha Shillong. Halor kane, ki pulit ki la pynïeng bad buh ki jaka talasi ha Nongpoh, ha kaba la ïoh ban kem ïa 5 ngut ki briew, kata saw ngut kiba la rangbah bad iwei i khynnah.
Haba nyngkong, kine ki briew ki la pynithuh ïalade da kaba sei ïa ki Aadhaar bad PAN card hynrei da ka jingtohkit bniah la shem ba kine ki briew ki dei ki nong Bangladesh kiba la rung beaiñ sha India la ar bnai eiei da ka jingïarap jong ka kynhun ba pynrung briew tuh na khappud. Kine ki briew ki la leit shaduh sha Mumbai ban wad kam bad mynta ki la wanphai pat ban leit sha Bangladesh.
Kine ki nong Bangladesh ki la phla ba ki la ïoh ïa ki kot ki sla nong India kynthup u Aadhaar bad Pan card-lyngba u Shaikh Mohd Mujib, uba sah ha ka thaiñ Sewri, Mumbai. La kynnoh ba u Mujib u dei uba hakhmat eh ban pynbiang ïa ki kot ki sla ïa ki briew na Bangladesh bad u ju pynbeit ruh ïa ki briew ban wan ïalam ïa ki nong Bangla lyngba ki jaka khappud kum ha Mumbai, Ahmedabad bad kiwei kiwei.
Ka jingtohkit ka la sei pyrthei ruh ïa ka kam bymman ha Mumbai ba ïalam da ka Nusrat A Kazi bad u Jabir Yunus Shaikh, kiba ju pyndonkam ïa ki kot ki sla thok ban pynplie bank account ïa ki nong Bangladesh ba wan rung tuh. Ïa kine ki account la pyndonkam pat ha ki kam shim ram tuh bad cybercrime, kynthup ka jingdie tuh sha ki briew kiba pynïaid ïa ki cyber crime ban kamai pisa da ki kam shukor.
Halor kane, ka kynhun Special Investigation Team (SIT) na Meghalaya ka la hiar sha Mumbai ban thwet ïa ki briew kiba donkti. Ka kynhun da ka jingïarap u Commissioner of Police ka Navi Mumbai, Miland Bharambe bad ka kynhun khynra ki Pulit ka Mumbai, ka SIT ka la pynlong ïa ka jingkhynra kaba neh shitaïew lynter ha kylleng ki jaka ka Navi Mumbai bad South Bombay.
Ha kane ka jingkhynra, ka SIT ka la ïoh kem ïa ka Nusrat A Kazi bad ïa u Jabir Yunus Shaikh na Koparkhairane bad Ulwe katba ïa u Shakh Mohd Mujib la ïoh ban kem na Rafi Ahmed Kidwai Marg, South Mumbai. Ka SIT ka la ïoh ruh ban kurup ïa bun bah ki kot ki sla ba shna thok, ki kor digital bad ki tiar ki tar ba shna thok ïa ki ID.
Ïa kine ki briew la wan ïalam noh sha Meghalaya da ka jingpan jingbit ban ïoh pynlong ïa ka jingtohkit kaba bniah.
