Shillong, Naitung 10
Ka kynhun ki pulit na ka Jylla Meghalaya ka la dep ban phah sha Mizoram, ban thwet ïa u Samla uba la shah kdew donkti ha kaba leh be-ijot bad byrngem pynjah burom ïa ki kynthei ha Shillong.
La ong ba ka Meghalaya State Commission for Protection of Child Rights (MSCPCR), ka la shim jingïatreilang bad ki bor pulit ka East Khasi Hills District, ha kaba la thwet ïa u tei u Samla uba la suba phet rieh sha Mizoram, mar ïa saphriang ki jingkynnoh pyrshah ïa u ha ki rynsan social media.
Ki bor pulit ki la thep ejahar bad pynlong ka jingtohkit halor ki jingkynnoh kiba la kam, ba une u Samla u la leh be-ijot ïa bun ngut ki kynthei bad byrngem pynjah burom ïa ki, kata da kaba byrngem pynsaphriang ïa ki dur bad durkhih (video) shimet kiba u la shon ne ringdur ïa ki.
Hynrei katkum ki tyllong khubor ki ïathuh, ba haduh mynta la don tang kawei ka jingmudui na kawei ka kynthei pyrshah ïa utei u Samla, watla ki kam pat ki kdew ba ki lah ban don bun ngut kiba u la pynngop.
La ong ba ka Commission ka la lap ïa katei ka kam na ka jingsaphriang ki dur bad jingthoh ha ki rynsan social media bad kumta ka la rah ïa katei ka kam sha ki pulit.
Shuh shuh ka khubor na ki pulit ka ong, ba u tei u Samla u dang phet rieh haduh mynta bad ki la don ki kaiphod khubor kiba kdew, ba ki bahaïing jong utei u Samla kim treh ban kren ei-ei tad haduh ba kin da ïamir jingmut shuwa bad u nongïasaid aiñ.
Ha kawei pat ka liang, ki kynhun treimon sngewbha jong ki jaidbynriew Mizo ha Shillong, ba kynthup ïa ka Young Mizo Association, Mizo Students’ Union bad Mizo Women’s Organisation, ki la pynlong ka jingïalang bad pynrem ïa kane ha ryngkat ka jingai jingïatreilang bad ki bor pulit ha ka jingtohkit.
Ki nongïalam ki la ong, ba hashuwa ba kin ïoh ïakren bad utei u Samla pynban u la phet na Shillong sha Guwahati ban leit sha Aizawl. Kumta ïa ka jingwad bniah la aiti sha ka YMA Central Body ha Mizoram ban buddien halor kane ka kam.
