Shillong, Naitung 10
Ka Sorkar Meghalaya ha ka sngi Thohdieng, kala pynbna be-aiñ ïa ki khyrdop lum khajna jong ka Khasi Hills Autonomous District Council (KHADC) ba ïalam da ka Voice of the People Party (VPP) na ki jingrung ki jingri jingdup ha Meghalaya.
U Myntri ba khmih ïa ka tnad Animal Husbandry & Veterinary Bah Sanbor Shullai haba pynbna ba ki khyrdop ka KHADC ki long kiba beaiñ, u la pyntip ba ka tnad kala bthah ïa ka KHADC ba kan khang noh ïa ki.
U Bah Sanbor u la ïathuh ba ka Sorkar kala ïoh pdiang ïa ki jingujor ba ïadei bad ka work order ba la ai da ka KHADC sha u Francis L Nongbri ba na Mawlai Nongkwar ba un pynïeng ïa ka khyrdop lum khajna na ki jingri jingdup kum na ki masi, sniang, blang, syiar, ha ka thaiñ Byrnihat.
“Nga la phah ïa ki work order sha ki ophisar jong ngi ba kin bishar la kine ki hukum ki long kiba shong aiñ ne kiba beaiñ,” ong u Bah Sanbor.
Hadien kane, ka tnad kala thoh sha ka tnad District Council Affairs (DCA) ha ka 30 tarik Jylliew, haba phah ruh ïa ka hukum ka KHADC ba 1 tarik Jylliew, kaba shah ban pynïeng ïa ka khyrdop ban lum khajna na ki kali kiba kit ïa ki jingri jingdup ha 19 Mer, Byrnihat na ka bynta u snem 2026-27.
Ha ka shithi, u Under Secretary Bah P Lyngdoh u la ong, “La bthah ïa phi ban sngewbha pyntip sha ka KHADC bad kiwei ki Autonomous District Council (ADC) jong ka Jylla ba ka jinglum khajna ïa ka jingrung ki jingri jingdup ym shym la shah satia”.
“Kumta, ka long kaba be-aiñ. Ngi la phah ïa ka shithi na ka tnad ban nym shah ïa ka District Council ba kan lum ïa ka khajna na ka jingwanrah ïa ki jingri jingdup,” ong u Bah Sanbor. Shuh shuh u Myntri u la ong ba la bthah ïa baroh lai tylli ki ADC ba kim dei ban lum khajna ïa ka jingwanrah ïa ki jingri jingdup shapoh ka Jylla.
