Shillong, Naitung 10
U Deputy Commissioner ka East Khasi Hills u la bthah ïa baroh ki jaka khaïi kiba treikam hapoh ka Right of Way (ROW) jong ka surok National Highway naduh 3 Mer haduh 7 Mer ha Upper Shillong ba ki dei ban pynpra bad weng noh ïa ki jingtei beaiñ hapoh ki 15 sngi.
Ïa katei ka hukum, kaba la pynmih ha ka 30 tarik Jylliew, la mynjur katkum ka hukum jong ka Supreme Court jong ka Ri India, ha kaba ïadei bad ka jingshngaiñ ha ki surok bah.
“Ha ka jingbud ryntih ïa ka hukum jong ka ïingbishar ba hakhlieh duh jong ka ri ka Supreme Court ha ka Suo Moto Writ Petition (Civil) No. 9 jong u snem 2025 ha kaba ïadei bad ka jingshngaiñ ha ki surok bah jong ka ri, ha kaba, ka ïingbishar Supreme Court ka la khang pyrshah ïa ka jingtei bad jingpyntreikam ïa kano-kano ka jingtei thymmai jong ki ‘dhaba, ki jaka bam lane tei ki jaka khaïi hapoh ka Right of Way (ROW) jong ka surok National Highway,” la ong ka hukum.
Kane ka jingbthah ka treikam ïa baroh ki jaka bam bad ki dhaba kiba treikam mynta ha ka ROW ha shilynter jong ka surokbah ka bynta naduh 3 Mer haduh 7 Mer, Upper Shillong.
“La bthah ïa baroh ki jaka khaïi, ki jaka bam, dhaba kiba treikam ha ka ROW jong ka National Highway naduh 3 Mer haduh 7 Mer, Upper Shillong ban pynpra bad weng noh ïa ki jingtei beaiñ kiba don ha ka ROW hapoh ka por kaba 15 (khatsan) sngi naduh ba la pynmih ïa kane ka hukum,” la ong ka hukum.
Ka la maham shuh shuh ba lada ym kohnguh kan lam sha ka jingshah weng jubor.
“Lada ym lah, ka NHIDCL bad ka PWD kan pynïaid shakhmat ban pynpra ïa ki jingtei beaiñ,” la ong ka hukum ba la soi da u Deputy Commissioner cum Chairperson ka District Highway Safety Task Force, East Khasi Hills District.
