Shillong, Naitung 10
Ka long shisha ka khubor kaba sngewtynnad ban tip ba ka Federation International Football Association kaba dei ka bor pynïaid ïa ka jingïalehkai phutbol jong ki ri ka pyrthei na Football World Cup ka la ai khublei kyrpang ïa ka Shillong namar ka jingieid ki paidbah ban leit peit phutbol ha ka por ba ïalehkai ka Argentina bad Egypt kaba la long ha ka 7 tarik mynta u bnai ba la pynkhreh ha Chief Minister World Cup Fan park 2026 kaba la shna ha jaka ïeng kali ha Polo.
Kane ka jingai khublei ka dei haba ka FIFA ka la thep ïa ka durkhih ha instagram jong ka FIFA kaba la pyni haba ring da u drone ban ïohi ïa ki paidbah ba ki la shadkmen haba ïalehkai ka Argentina bad Egypt.
Ha ka jingthoh ba la thep da ka FIFA ka la ai khublei ïa ka Shillong namar ka jingitynnad ïa ka jingpyni ïa ka jingieid ïa ka jingïalehkai ban wanrah ïa ka bor jong ka jingïatylli, namar ka FIFA World Cup ka dei ka jingïalehkai kaba heh tam ha pyrthei kaba wanrah ïa ka jingïajan ïa ki jaidbynreiw bapher-bapher ha ka pyrthei.
Haba ka FIFA ka dang pyllait tang kumba shi kynta ïa kane ka durkhih hynrei kiba peit ki la poi 4 lak 40 hajar ngut ha instagram bad palat 31 hajar ngut kiba like bad 638 kiba comment.
Kumban shu pynkynmaw ki paidbah kiba la poi ha madan Polo ki long lai hajar ngut hynrei kiba kham bun ki dei kiba kyrshan ïa u Messi namar la ithuh ba kiba bun ki la pyrta ïa ka kyrteng u Messi bad haba ka Argentina ka la jop ki paidbah ki la shad kmen.
Da ka jingai khublei ka FIFA ïa ka Shillong kane kan long shibynta ba ym tang ha India hynrei ka pyrthei baroh kan ithuh ba ka Shillong kan dei kawei ka jaka ba ki paidbah ki ieid ïa ka jingïalehkai phutbol.
