Bthah u myntri ïa ki BSF ban pynkhlaiñ ha ki jaka khappud bad thaw da ka STF ban tehlakam ka jingkhaïi masi tuh

Shillong, Naitung 10

U Myntri Animal Husbandry & Veterinary ka Sorkar Jylla ha ka sngi Thohdieng jong ka taïew u la pyntip ba u la bthah ïa ki shipai BSF ban pynkhlaiñ ha ki jaka khappud, ban thaw ïa ka Special Task Forces ha man la ki district bad ban jur ruh ba ïa ka jingdonkam ban ker sainar, khnang ban tehlakam ïa ka jingkhaïi masi tuh sha Bangladesh.

U Bah Shullai u la ong ba ïa kane la bthah hadien ka jingïalang bad u Inspector General (IG) BSF, ha ryngkat ki heh ophisar bad ki ophisar ka tnad Veterinary.

“Dang ha kine ki khyndait sngi, ka la mih ha ki rynsan social media bad la kynnoh ba ka jingshyrkhei ka jingkhaïi tuh ïa ki masi. Nga la thoh mardor sha u IG, BSF. Te mynta ka sngi ngi la don ka jingïakynduh lang bad u IG, BSF bad ngi la ïakren bun ki kam,” la ong u Bah Sanbor.

U Myntri u ong ba kawei ka bynta kaba la ïakren bha, ka long ban peit thuh bha bad talasi ha ki jaka ba jur ka kam khaïi tuh.

“Ngi la kyrpad ïa ki shipai BSF ba kin pynlong ka jingtalasi ryngkat ka jingïatreilang bad ka tnad pulit bad ki district,” u la ong.

“Ngi la ïakren ruh ban buh noh da ki ‘check point’ ha ki jaka kiba jur bha ka jingkhaïi tuh ïa ki masi, ka ban long hapdeng ki pulit, tnad Veterinary bad ki BSF,” ong u Bah Sanbor. U Myntri ula pyntip ruh ba u la dep ai ka jingbthah ban thaw noh mardor ïa ki District-Level Task Force ki ban bat ïa ki masi ba khaïi be-aiñ.

“Nga la kyntu ïa ki Ophisar, ba kin thaw mardor ïa ki Special Task Force, kaba long katkum ki Rule ha baroh ki District, ba kin bat ïa ka jingkit ïa ki masi ba la kurup. Ïa kine ki masi ba ïoh kurup dei ban wanrah sha ka Animal Shelter jong ka Tnad” u la ong.

Haba batai bniah, u la ong “Katkum ka SOP bad ka jingpynbna bala pynmih da ka Tnad Animal Husbandry & Veterinary, dei ban thaw ïa ka Special Task Force ha baroh ki District ban kit ïa baroh ki masi ba la ïoh kurup sha ki Animal Shelter. Ki dkhot ka Task Force kin kynthup ïa ki BDO jong ki C&RD Block kum ki Chairman, ha ryngkat ki O/C jong ki Police Station bad ki Veterinary Officer kum ki Dkhot. Kiwei pat ki dkhot kin kynthup ïa ki District AH & Veterinary Officer bad ki Sub-Divisional AH & Veterinary Officer”.

Halor ki jingtei ha khappud, u Bah Sanbor u la ïathuh ba ka Sorkar kan pynsted noh ïa ki kam ker sainar ka ban pynshong nongrim halor ki jingtip ban sa ai da ki BSF.

“Da kaba pynshong nongrim ïa ki jingai jingmut jong ka Tnad bad ki BSF, ngin sa pynsted noh ïa ka jingker sainar. Katkum ki record, ha Ri-lum Khasi bad Jaiñtia, ki dang sah sa 27 km ki bym pat pyndep ïa ka jingker sainar, katba ha Ri-lum Garo ki dang sah sa kumba 7 km tam” u la ïathuh.

Kumta, u Bah Sanbor u la ong ba ki bor shipai BSF ki la kyrpad ïa ngi, ba ngin ai ïa ki jingtip kiba bniah halor ki jaka kiba dang ieh ban ker sainar. Haba bynrap ba la aipor 13 sngi ïa ki shipai BSF ba kin aiti ïa ki jingai jingmut ha ka ban pyndep noh ïa ka jingker sainar ha kine ki jaka ba dang sah.

U ïathuh ba kan sa don biang ka jingïalang bad ki BSF hadien 13 sngi.