Shillong, Naitung 10
Ki kam tuh kam thiem ki dang ïai bteng na kawei ka sngi sha kawei pat bad ïa kane lah ban sakhi na ki jingjia shah tuh ki arshaka, shah prong tuh ki ïing bad ki kali ka dang ïai jia ha kylleng ka nongbah Shillong bad wat sha kiwei ki bynta jong ka Jylla ruh kumjuh.
Katkum ka khubor kaba la ïoh na ki pulit la ong ba u Bayolroy Kharumnuid u la ai ka jingujor ba ha ka 9 tarik mynta u bnai ha ka por 3 baje dang step, ki runar bym lah ban ithuh, ki la tuh ïa ka arshaka ka jong u, kaba don ïa u registration number ML05-Z-2084 na ka jaka sah ka jong u, kaba don ha ka shnong Mawpdang (EKH).
Ha kawei pat ka khubor, ka Saka Leikhamshel ka la ai ka jingujor ba ha ka step jong ka 7 tarik mynta u bnai, ki runar bym lah ban ithuh, ki la tuh ïa kawei ka arshaka kaba don ïa u registration number 26BH-3273F kaba dei trai da u kurim jong ka na Lumkhyriem, Shillong.
Katba na ka liang jong ka Susan Moore Warjri ka la ai ka jingujor ba ha ka 25 tarik u bnai Jylliew, 2026 bad 4 tarik mynta u bnai, ki runar bym lah ban ithuh, ki la tuh ïa ki tape kali na ki ar tylli ki kali jong ka, kiba don ïa u registration number ML05-AH-1038 bad ML05-AC-9696 ha 7 Mer, Upper Shillong.
Ha kawei pat ka khubor, ka Henrietta Shylla kaba na Laitumkhrah, Shillong ka la ai ka jingujor ba ha ka 7 tarik mynta u bnai, ki runar bym lah ban ithuh, ki la prong tuh hapoh ka dukan jong ka, bad ban tuh ïa ka pisa kaba long T.6 lak.
Na ka liang jong ka Happyland Mawblei ruh ka la ai ka jingujor ba ha ka 6 tarik mynta u bnai, ha ka por 2 baje mynsngi, ki runar bym lah ban ithuh, ki la tuh ïa ki jingri na ka shnong Mawlyntriang (EWKH).
U Ranu Islam jong ka shnong Bharalgaon kaba hap hapoh ka thanad Rajabala (WGH) u la ai ka jingujor ba ha ka 7 tarik mynta u bnai ha ka por kumba 1 baje mynsngi, ba ka arshaka jong u, kaba don ïa u registration number AS21-M-7462 la lap ba ka la jah na ka jaka kaba don hajan jong ka Sub-Divisional (C) Court (WGH).
Ha kawei pat ka khubor, ka Jignak M Marak ka la ai ka jingujor ba ha ka 6 tarik mynta u bnai, ka la lap ba ki runar bym lah ban ithuh, ki la prong tuh hapoh ka Chandigre Anganwadi Centre (WGH) bad ban tuh ïa ki tiar ki tar bad kawei ka mashin thew jingthew (weighing machine) nalor kiwei ki tiar.
