Shillong, Ïaïong 21
Ka Tnat pule puthi jong ka Sorkar Jylla ha ka 21 tarik Ïaïong 2025, ka la pynlong ïa ka jingïalang hapdeng ki kynhun jong ki nonghikai SSA ban ïakren haba ïadei bad ka jingpan shimti ka tnat pule-puthi jong ka Sorkar ïa ki skul SSA.
Ha kane ka jingïa-lang, la ïadonbynta lang da u Commissioner & Secretary ba dei khmih ïa ka Tnat pule-puthi, u Vijay Kumar Mantri lem bad ki DSEO, SDSEO bad lai tylli ki seng Nonghikai ba kynthup ïa ka All Meghalaya SSA School Teachers’ Association (AMSSASTA) bad ka Meghalaya Fourth Teachers’ Association (MFTA).
Haba kren sha ki lad pathai khubor hadien ba la wai ka jingïalang, u President ka Meghalaya SSA School Association, Bah Aristotle C Rymbai, u la ong ba ka tnat pule-puthi jong ka Sorkar Jylla ka la khot ïakren ïa katei ka jingïalang ha ka sien kaba san ha kaba ïadei bad ka jingaiti noh ïa ka bor pynïaid na ka SSA sha ka tnat pule-puthi.
U Bah Aristotle u la ïathuh, na ka liang ka tnat pule-puthi ka la ai ïa ka jingkheiñ haba ïadei bad ka jingïoh lum ïa ki NOC na ki skul shnong halor ka jinglong kloi jong kitei ki skul ban aiti noh ïa ka bor pynïaid na ka SSA sha ka Tnat pule-puthi.
U la ong ba ki skul shnong kiba kloi ban aiti noh ïa ka bor pynïaid sha ka tnat pule-puthi ki don 2000 hajar tam na ka 3000 kiba la phah ïa ka NOC sha ka Sorkar haduh mynta bad 23 tylli ki skul shimet na East Khasi Hills kiba la aiti ïa ka NOC ba ki la long kloi ban aiti noh ïa ka bor pynïaid na ka SSA sha ka Tnat pule-puthi.
“Na ki 3000 tam ki skul shnong ha Jylla, kila ïoh pdiang haduh 2000 tam ki NOC bad 23 tylli ki skul shimet na East Khasi Hills kiba la aiti ïa ka NOC ba ki la long kloi ban aiti noh ïa ka bor pynïaid na ka SSA sha ka Tnad pule-puthi”, ong u Bah Aristotle.
Shuh-shuh, u Bah Aristotle u la ong haba ïadei bad kito ki skul SSA kiba dang artatien ban aiti ïa ka jingpynïaid skul sha ka Sorkar, na ka liang ka Sorkar kan sa phah biang da ka jingthoh sha baroh ki School Managing Committee ha ryngkat bad ki jingpynshai ïa ka jingthmu jong ka Sorkar da kaba ai por haduh 15 tarik u bnai Jymmang, 2025.
Haba ïadei bad ki skul shnong, ka Sorkar ka dei ban shimti beit ïa ki skul shnong khnang ba kan long ka jingmyntoi ïa ka skul kaba don ha ki shnong-ki thaw.
Haba ïadei bad ki nonghikai kiba don ha kitei ki skul, na ka liang ki nonghikai SSA ki la ïakren sani bha ha kaba ki la pynpaw ha ki skul kiba duna ki khynnah skul, ki dei ban pynkynriah noh ïa ki nonghikai sha ki skul kiba don bun ki khynnah skul ha kaba ïa kane ka mat yn sa pyndep ha u bnai Jymmang.
