Shillong, Ïaïong 21
Ka jingshlei um ki surok ha Shillong ha ka por ba slap ka la wanrah jingeh ïa ki paidbah nongleit nongwan, wat la ka jinghap slap ka long tang ha ki khyndiat minit, bad kaba pyni saidmet ïa ki paidbah ka long na ka jingkhlei jaboh ki nala bad tuid satah pat sha surok.
Haba ïakren bad u Symbud Myntri Rangbah ka Jylla ba khmih ïa ka tnat PWD (Roads), Bah Prestone Tynsong, u la kyntu ïa ki paidbah ban shim lang ïa ka jingkitkhlieh da kaba kiar ban theh ïa ki jaboh jabaiñ ha ki nala kaba la wanrah jingeh ïa ka tnat.
“Kane kam dei eh tang ka jingkitkhlieh jong ka tnat PWD, namar man ki surok ba ngi shna ngi la pyrshang katba lah ban shna bha ïa ki nala ba ka um kan tuid beit lada slap ban lait na ka jingshlei um sha surok,” u la ong.
Haba pynpaw ba ka um ka dei ka nongpynjot rathai ïa ki surok, u Bah Prestone u la ong, “Ka nongshun ba khraw tam na ka bynta baroh ki surok ka dei ka um, lada ka um ka ïai tuid ka surok kan ym shan wat la ka long tang shibnai arbnai.
U la ong ba la ka long ha sor ne sha nongkyndong kaba nyngkong eh ka tnat ka buh hakhmat kam dei tang ïa ka surok ban ïaid ban ïeng, hynrei kumjuh ruh ïa ki nala.
Haba kyntu ïa ki nongshong shnong ka sor Shillong u Symbud Myntri Rangbah u la ong ba paidbah ki dei ba kin shim jingkitkhlieh lang na ka bynta ban lait na ka jingjot ka surok bad ban lait na ka jingshlei um.
“Teng-teng ha ki nala ki bret ki jaboh-jabaiñ bad theh khnang la kum ba dei ki jaka bret jaboh ban rah ka um. Nga ïohi ba kane ka dei kawei ka jingeh ba ka tnat ka ïakynduh. Nga kwah ban kyrpad rit ïa baroh ki nongshong shnong, to ngin ïa kitkhlieh lang ba ngin lait na ka jingshlei um da kaba ailad ïa ka um ba kan tuid beit ha ki nala ban lait na ki jingma bad pynneh ruh ïa ki surok,” la ong u Bah Prestone.
Na ka liang u Symbud Myntri Rangbah u la ïathuh ruh ba shen ka tnat PWD kan sa siang rong ïa baroh ki surok ha sor Shillong bad kyntu ban don ka jingïatreilang jong ki paidbah khnang ba ka surok kan neh slem.
