Shillong, Ïaïong 21
Ka tnat Pule-Puthi jong ka Jylla ha ka Lah Sngi U Blei ka la rai ban pynjlan por biang na ka bynta ki skul Samagra Shiksha Abhiyan (SSA) ban aiti noh ïa ka bor pynïaid sha ka Sorkar.
Haba kren sha ki lad pathai khubor hadien ka jingïalang, u Director of School Education and Literacy, Bah Banteilang J Kharshandi u la pyntip ba ka jingpynjlan ïa ka por ka dei na ka bynta ki skul ba pynïaid da ki shnong (Community) kaba long haduh ka 15 tarik Jymmang ban wan, khnang ba ki bor pynïaid skul SSA kin pyrkhat janai shwa ban ai ka jingmynjur ban aiti pynïaid noh ïa ki skul ha ka Sorkar.
Une u heh ophisar u la ong, namar ba ki nongpynïaid skul SSA ki dang sngew artatien bad ki la buh shibun ki jingkylli halor kane ka jingthmu ka sorkar, ka jingïalang ka la rai ban pynjlan por shuh.
“Kiba bun na ki nongpynïaid skul ki dang kwah bun ki jingpynshai bad ki jingïakren, dei na kane ka daw ba ngi la pynjlan biang ïa ka por haduh ka 15 tarik,” u la ong.
U la ong ba kito ki skul SSA kiba pynïaid ki riewshimet, bad ki kynhun niam, ki hap ban ai da ka jingthoh sha ka Sorkar lada ki mynjur ban aiti noh sha ka Sorkar ban pynïaid ïa ki skul.
Ha kajuh ka por u Bah Kharshandi u la ong ba ka jingïalang ka la ïathir ruh halor ki skul kiba duna khynnah bad ki don ruh kiba duna nonghikai, ha kaba la ai jingmut ba ha ki skul kiba duna ki khynnah yn phah noh ïa ki nonghikai sha ka skul ba bun ki khynnah, bad na ka bynta kane la aiti ha ki SDSEO bad DSEO ban peit bad ban phah ïa ka kaiphod sha ka Sorkar.
Haba kylli, u Bah Kharshandi u la ong ba ka Sorkar India ka kwah ban pynbeit ïa ka rukom treikam ka tnat pule puthi ha kaba ïadei bad ki skul namar ba ki don shibun ki jait skul ha ka Jylla, namar nalor ki skul Sorkar, SSA, ki don ruh ki skul bym dei Sorkar ba kynthup ïa ki Adhoc, deficit bad kiwei-kiwei.
