Nongstoiñ, Ïaïong 21
Ha ka janmiet Lah Sngi U Blei jong ka taïew, ki pulit ka thanat Nongstoiñ ha ryngkat ka jingïatreilang bad ka kynhun jong ka Anti-Narcotics Task Force (ANTF) ki la ïoh ban kem noh ïa uwei u briew ba la suba jur ba u dei u nongkhaïi drok.
U Superintendent of Police (SP), West Khasi Hills, u la ong ba katei ka jingïoh ban kem ka dei hadien ba ki pulit ki la ïoh jingtip kaba tikna halor ka ïaid ka ïeng jong ki suba nongkhaïi drok ha kaba ki la pynlong ruh ïa ka jingkhynra bad pynap shrip hapoh ïew Nongstoiñ. Ha kane ka jingkhynra bad pynap shrip la ïoh ban kem ïa u Dibostar Hoojon na ka shnong Umyiap kaba don ha ki thaiñ Langpih, bad uba shong ba sah shipor ha ïew Nongstoiñ, kata hadien ba ki la ïoh jingtip ba u dei u nongkhaïi ïa u jingdih pynbuaid ïa kaba la antad ba u dei u ganja. Shuh shuh ka khubor na u SP ka ong ruh ba ha ka jingkhynra ïa ka ïing wai jong u kaba don ha ïew Nongstoiñ, ki pulit ki la lap bad kurup haduh 574 gram u drok ba la suba ba u dei u ganja bad ïa katei ka jingkhynra la leh ha ka jingïadon lang ki nongsakhi ba laitluid.
U SP u la ong ruh ba ki pulit ki la pynrung ïa ka mukotduma hapoh ki kyndon jong ka NDPS Act bad ka jingtohkit halor kane ka dang ïaid shakhmat.
