Jowai, Ïaïong 21
U District Magistrate (DM) jong ka West Jaiñtia Hills District, AK Singh, IAS, haba pyndonkam ïa ka iktiar ba la pynkup ha u katkum ka Section 163 BNSS, u la pynmih ïa ka hukum ban khang ïa ka jinglum bai rung be-aiñ ha ka surok kaba leit sha Kupli Orchid Resort ha Priang, West Jaiñtia Hills District.
Ka hukum ka ong ba ka Dorbar Shnong jong ka shnong Priang ha West Jaiñtia Hills District, ka ju khrong ïa ka bai rung (Entry) ha ka surok kaba leit sha ka Kupli Orchid Resort.
Katkum ka kaiphod (report) na u Block Development Officer (BDO), Laskeiñ C&RD Block, ki seng treimon sngewbha bapher bapher, ki ‘riewshimet bad ki trai jaka, ki la ong ba ka jingdon jong ka khyrdop beaiñ bad ki jaka ba marjan ka la wanrah shibun ki jingeh bad jingkhanglad ïa ki paidbah nongleit nongwan lyngba kane ka surok.
U DM u la pynpaw ba kum kane ka jinglum bai rung beaiñ ka wanrah ka jingthut ïa ki paidbah bad ka jingsuk jingshngaiñ ha ka thaiñ lada ym khanglad.
Kane ka hukum kan treikam mardor tad haduh ban da pynmih kiwei pat ki hukum.
