Shillong, Ïaïong 21
Ka Sorkar Jylla ka la ïakhun tyngeh ban pynïoh jaka pule ïa baroh ki khynnah kiba pass ïa ka SSLC bad pynpaw ruh ïa ka jingkyrmen ba yn lah ban sdang noh ïa ka Klas 11 naduh 1 tarik Jylliew.
Ha ka Lah Sngi U Blei, ka Sorkar lyngba ka tnat Pule-Puthi ka la ïathir sani bha kumno ban pynïoh jaka pule ïa baroh ki khynnah ha ka Klas 11, hadien ba ka pass percentage jong ki khynnah ba ïakhun ïa ka eksamin SSLC ka la kiew syndet mynta u snem.
U Director of School Education and Literacy, Bah Banteilang J Kharshandi haba kren hadien ka jingïalang u la ïathuh ba la ïakren sani bha ha ka ban kyntiew kyrdan noh ïa saw tylli ki Government Secondary School sha ki Higher Secondary School.
U la ong ba ka Sorkar ka don tang saw tylli ki Secondary School ki bym pat kyntiew kyrdan sha ka Higher Secondary School, bad kine kim pat lah ban pdiang klas ïa kiba pass Klas X, hynrei ka donkam ïa ki skul bym dei jong ka Sorkar ruh ba kin kyntiew kyrdan kumjuh.
U la ïathuh ba la pynmih ka jingbthah sha baroh ki DSEO ba kin pynpoi ïa ki ‘admission form’ na ka bynta ban pynrung klas ha ki jait jingpule lane ‘streams’ bapher-bapher ba ki skul ki kwah ban don.
“Ka shong ha ka jingkwah ki khynnah. Hadien ba la ïoh ïa ka jingkheiñ jong ka jingdon ki khynnah kiba kwah ban jied ïa jait jingpule ‘stream’, ki DSEO kin sa phah sha ka tnat Pule-Puthi khnang ban tip la ka donkam ne em ban kyntiew kyrdan ïa kano-kano ka skul,” la ong une u ophisar.
U Bah Kharshandi u la ong ba kan ym ïahap ban plie ïa kano-kano ka stream ha ka skul kaba don tang 8-9 ngut ki khynnah, namar kan don ka jingthung ruh ïa ki nonghikai thymmai.
U la ong ba ka Sorkar kan sa bishar bniah ïa ka kam thung nonghikai hadien ba ka la ïoh ïa ka jingkheiñ jong ka jingdon ki khynnah kiba kwah ban pule ïa kano-kano ka laiñ jingpule.
“Lada ngi ïoh kumba 30-40 ngut ki khynnah, kum ka nuksa, ban buh ïa ka Science stream ha kawei na ki Higher Secondary School jong ka Sorkar, ïa kata ka jingtyrwa lah ban phah sha ngi, bad ngin sa rah pat ïa kata ka jingtyrwa sha ka Sorkar, bad hadien ba la ïoh ïa ka jingmynjur na ka kynhun Myntri ngin sa bthah pat ïa ki DSEO ba kin ïaid shakhmat ïa ka jingpynrung klas,” u la ong.
Ha kajuh ka por u Bah Kharshandi u la ïathuh ruh ba ha ka jingïalang la ïakren sani bha ruh halor ka jingplie ïa ki skul step ‘morning section’, khnang ban lah pynrung klas lut ïa baroh ki khynnah kiba pass, ha kaba u la pyntip ba na ka bynta kane ruh ki DSEO kin sa phah ïa ki jingkheiñ ba ki ïoh lum sha ka Sorkar.
