Shillong, Ïaïong 21
Kum shi bynta ban pynpaw ïa ka jingsngewlem halor ka jingkhlad noh u Kpa Bakhuid, Pope Francis ha ka Lah Sngi U Blei, ka Jylla Niambah Shillong ka la pynmih ïa katto-katne ki jingbthah bad kyrpad ïa baroh ki Lyngdoh, Brother bad Sister ban bud ryntih ïa ki ha kum kane ka por jong ka jingsngewsih.
“Katba ngi dang don hapdeng ka jingsngewsih halor ka jingkhlad noh jong u Kpa Bakhuid baieid eh jong ngi, nga kyrpad ïa baroh ki Lyngdoh, Brother bad Sister ba kin sngewbha ban bud ryntih ïa ki jingbthah,” ong u Archbishop ka Jylla Niambah Shillong, u Most. Rev. Victor Lyngdoh ha ka kyrwoh khubor.
U Archbishop u la bthah ban tied ïa ka baje Balang ha baroh ki Parish mynta ka janmiet bad lah ruh ban pyni ne buh ïa ka dur jong u Pope (uba la khlad noh) ha baroh ki Ïingmane bad phyllaw jong ki shlem jaka mane.
U la ong ruh ba dei ban don ka jingtyrwa Mass ha baroh ki Parish bad ki jaka lehniam na ka bynta u Kpa Bakhuid, hynrei dei pat ban kynmaw ba ïa ka kyntien kaba kdew sha u Pope, kynthup ïa ka kyrteng jong u, ban weng noh na ka Jingduwai Ïukharist ha ka por jong ka “Sede Vacante” (ka jaka ba thylli).
“La weng noh ïa ka jingkdew ïa ka kyrteng jong u Pope bad dei ban kdew tang ïa ka kyrteng jong u Bishop ha ka Jingduwai Ïukharist. Ïa kane ka rukom la bud tad haduh ban da jied bad thung ïa u Pope bathymmai,” u la ong da kaba bynrap ba dei ruh ban pynrung ïa ki jingduwai ha ka Jingduwai jong ki ‘Riewngeit ha baroh ki Mass.
Ka kyrwoh ka ong ruh ba kum ka dak jong ka jingburom ïa u Kpa Bakhuid, la kyrpad ban kiar na kaba pynlong ïa kino-kino ki jingrakhe ha ka por ba don hapdeng ka jingsngewsih.
“Baroh ki jaka pule jong ka Balang Katholik kin khang ha ka sngi on tep (Da ka jingtip kaba biang sha ka tnad pule-puthi),” u la ong.
Shuh shuh kan don ruh ka ‘Requiem Mass’ ne ka jinglehniam ha ryngkat ki jingduwai na bynta ka mynsiem u Pope Francis ha ka Sngi Ba-ar, ha ka por 05:30 janmiet, ka 22 tarik Ïaïong, 2025, ha Cathedral.
“Ngi khot sngewbha ïa ki Lyngdoh, ki ‘riewniam bad ki ‘riewngeit ban wan duwai ba U Trai ba isynei jong ngi un ai ïa u Pope Francis ka jingjah thait ka bymjukut. Ngi buh ïa ka Balang jong ngi hapoh ka jingïada bad jingïasaid jong ka Maria,” pynkut ka kyrwoh.
