Shillong, Ïaïong 21
Ka Khasi Students’ Union (KSU) War Jaiñtia Circle ka dap da ka jingsngewkhia kaba jur haba la ïoh jingtip ba ki don katto katne ki ‘riew shim kabu kiba dei ki ‘dalal’ kiba thmu ban pynrung tuh ïa ki nong Bangladesh shapoh u pud u sam jong ka ri Khasi.
Ha ka kyrwoh khubor ba la pyllait da u General Secretary ka KSU War Jaiñtia Circle u samla Platine Mukhim u la ong, ka seng ha ka jingïakynduh kyrkieh ka la shim ïa ka rai ban wad bad pynshitom da kaba tyngeh ïa kito ki ‘dalal’ kiba long ki nongdie ri kiba shim kabu ban kamai pisa jubor khlem da kheiñ shuh ïa ka jingma ba ka jaidbynriew ka ap ïa ka jingwan buhai shnong da kine ki poi ei na ri Bangladesh.
Ka seng lada ka lap ïa kum kine ki jaid briew, kan ym map da lei lei ruh wat la dei da kino-kino ki lynti ruh kam salia.
Ka seng ka khot ka wer lang ïa ki paidbah jong ki thaiñ khappud lada ki lap ïa kum kine ki jaid briew ki dei ban ai jingtip noh mar-mar sha ka seng khnang ba kan ïoh ban leh ïa kaba donkam bad ka la kyntu ruh ïa ki paidbah nongshong shnong ban ai ïa ka jingïatreilang bad ka seng na ka bynta ka jingshngaiñ ka ri bad ka jaidbynriew.
