Shillong, Ïaïong 22
Saw ngut ki kyrtong na ka Thaiñ Shatei Lam Mihngi ki la seisoh haba phai sha eksamin UPSC Civil Services Examination 2024.
Napdeng kine, ar ngut ki dei na Arunachal Pradesh, uwei na Assam bad uwei pat na Mizoram.
Na Arunachal Pradesh, u Dr. Zing Messar u la ïoh ïa ka kyrdan All India Rank (AIR) 846, katba ka Bullo Manku ka la ïoh ïa ka kyrdan AIR 645.
Na Assam, u Bhaswata Saikia na Nagaon distrik u la seisoh ha kane ka eksamin ha ryngkat ka kyrdan AIR 474. Une u samla uba la pyndep ïa ka jingpule na IIT Guwahati (2018), ha shuwa u la seisoh ha ka eksamin UPSC ha u snem 2023 ha ka kyrdan AIR 552 bad ïa mynta u dang trei kum u ophisar IPS ha Pune.
Haba phai pat sha Mizoram, u Jerry Lalhratthang Buongpul u la ïoh ïa ka kyrdan AIR 999.
Kine ki jingjop ki ïeng kum ka jingpynshisha halor ka jingnangroi jong ki ‘riew shemphang ha ka Thaiñ Shatei Lam Mihngi bad ki long kum ka jingai mynsiem na bynta kito kiba angnud ban ïakhun ïa ka UPSC ha kylleng ka thaiñ.
Kumba ka long, ym shym la don mano-mano ruh napoh ka Jylla (Meghalaya) kiba la seisoh ha kane ka eksamin khamtam napdeng ki Khasi bad Garo mynta u snem.
Hashuwa, u Ankur Das, nongshong shnong ka Jail Road, Shillong u la wanrah ka nam ka burom ïa ka Meghalaya hadien ba u la seisoh ha ka eksamin Civil Services (2021), ïa kaba ka risol la pynbna ha u snem 2022. U Das u la wan ha ka kyrdan kaba 52.
