Shillong, Ïaïong 22
U Myntri ba khmih ïa ka tnat Community and Rural Development (C&RD), Abu Taher Mondal u la pyntip ba ka jingpynïasoh Aadhaar jong ki nongtrei bylla ‘Job Card’ ka la kiew haba ïanujor bad u snem ba la dep.
“Ngi la bthah ïa ki BDO ba kin pynthikna ba ki briew kiba kwah ïa ki jingmyntoi ki dei ban pynïasoh ïa ki ‘Job Card’ bad u Aadhaar,” la ong u Mondal haba kren bad ki lad pathai khubor ha ka Sngi Ba-ar.
U la ong ba ka tnat ka la ïakynduh jingeh ba ka Sorkar India kam pyllait ïa ka song pisa ha ki por ba kham mynshwa, namar ka jingbym pynïasoh Aadhaar kiba trei ‘Job Card’.
U la ïathuh ba na ka liang ka tnat ka la pynsngew ha u Myntri Rangbah ka Jylla, uba la thoh pat sha ka Sorkar India ban pyllait ïa ka Meghalaya na ka jinghap pynïasoh Aadhaar, bad ka Sorkar India ka mynjur ban pyllait haduh 2 snem ryngkat ka jingbthah ba hadien ka 2 snem kan ym don shuh ka jingpyllait pisa khlem da pynïasoh Aadhaar.
U Mondal u la ïathuh ba ki don ki song pisa ba ym lah ban ïoh namar ba don ki kyrteng jong ki briew ki bym pat pynïasoh Aadhaar, hynrei hadien ka jingbteng ban ïakren bad ka Sorkar India, la kohnguh ban pyllait lang ïa ka song pisa jong kito ki bym pat pynïasoh, bad nangne shakhmat ka la kren shai ba kan ym pyllait ïa ka pisa lada don tang uwei u briew ruh u bym don Aadhaar.
U Myntri u la pyntip ba ka jingpynïasoh ïa ki ‘Job Card’ bad u Aadhaar ka la sdang ïaid shaid-shaid bad kane kan ïarap shi katdei eh ban lah pyntreikam ha ka lynti kaba ïaid beit ïaid ryntih ïa ka Mahatma Gandhi National Rural Employment Guarantee Scheme (MGNREGS) hapoh ka Jylla.
“Ngi la bthah ïa ki ophisar ba dei khmih ba kino-kino ki bill ba kheiñ, kim dei ban don mano-mano ruh ki bym don Aadhaar,” la ong u Mondal.
