Shillong, Ïaïong 22
U nongpyntrei ïa ka surok na Mawlai Bye-pass shaduh Bhoirymbong uba dei na Kolkata u MS Abhoy Charan Bakshi, Purba Medinpur, West Bengal u khlem wan poi haba u MP ka Lok Sabha na Shillong u Dr. Ricky AJ Syngkon bad u MLA ka VPP na Mawlai Bah Brightstarwell Marbaniang ki leit jurip ha ka Sngi Ba-ar.
Ka jingthmu ban shna ïa kane ka surok ka long ban pynpoi shaduh Umroi Airport kaba la mang pisa da ka Sorkar India lyngba ka North East Special Infrastructure Development Scheme (NESIDS) ha ka jingjngai kaba 14.279 kilometre kaba la mang pisa haduh 34 klur tam bad 5 kilometre na CRF ka ban poi shaduh Bhoirymbong, Ribhoi District ba la pyntrei da u MS Abhoy Charan Bakshi, Purba Medinpur, West Bengal.
Ha kane ka jingjurip, u Bah Brightstarwell Marbaniang bad u Dr. Ricky AJ Syngkon ki la pynpaw ka jingbym sngewïahap haba ki la wan jurip biang ha kane ka sngi, haba u trai jong ka MS Abhoy Charan Bakshi, Purba Medinpur West Bengal uba pyntrei ïa kane ka surok um shym la wan poi da kaba ai daw ba ka liengsuiñ kaba u shong kam shym la wan shuh.
Ha ka jingïakren bad u Bah Brightstarwell u la ïathuh ba kane ka surok ka la ïaid kumba 70 persen ka jingpyntrei bad kumba 5 kilometer la dep ban siang rong.
U la ïathuh ynda la dep kane ka surok ka jingmyntoi ïa ki paidbah jong ka Mawlai Konstitwensi bad ïa ki paidbah ka jylla namar ki lah ban ïaid na kane ka surok ka ban poi shaduh Bhoirymbong.
U la pyntip ba ka tnat PWD Roads ka la ailad biang ïa une u nongpyntrei haduh bnai Nohprah 2025 ban pyndep syndon ïa ka kam ba dang sah.
Ha kawei pat ka jingleit jurip, u MLA ka Mawlai u la pynpaw ka jingbitar haba u nongpyntrei bad ka tnat PWD Roads ki slem ban pyndep ïa ka surok PMGSY na Mawtawar sha Mawsiatkhnam.
Kane ka jingbitar u Bah Brightstarwell ka dei ha ka por ba u leit jurip biang ïa kane ka surok ha ka Sngi Ba-ar kaba la sdang na Mawtawar Lummawsing ter ter sha Mawsiatkhnam kaba jngai kumba 10 kilometre.
Ha kane ka sngi la wan jurip lang u MP ka Shillong Dr. Ricky AJ Syngkon, u MDC ka Mawlai Bah Eddieson Kharumnuid ha jingïadonlang u Bah AB Umdor uba dei u Chief Engineer PMGSY PWD Roads, Kong A Sumer Executive Engineer PWD Roads National Highway Shillong Division, u nongpyntrei ïa ka surok bad ki nongïalam shnong.
Ïa kane ka surok la mang pisa palat T.6.85 klur hynrei haduh mynta la dep ban siang rong tang kumba lai kilometre shiteng katba ha kiwei ki jaka la dep siang tang ki maw.
Kane ka jingbitar u MLA ka dei namar mynshem snem ha u bnai Risaw u la dep wan jurip ha kaba ka tnat PWD Roads ka la ai por biang ïa u kontraktor ban pyndep haduh u bnai Lber 2025 hynrei mynta la ïaid u bnai Ïaïong, ka kam ka dang bun ba dang sahteng.
U Bah Brightstarwell u la ong ba uba pyntrei um dei ban ai daw namar lada pynslem ban shna ïa ka surok ka jingeh kan dei ïa ki paidbah.
U la pynpaw ka jingbym sngewhun haba u wan jurip ïa kane ka surok namar ka kam ka dang ïaid tang kumba 50 persen hynrei um tip kumno kin pyndep haba mynta la wan sa ka aiom slap.
Na ka liang uba pyntrei u la pynpaw ka jingslem ban siang rong ba la wan u slap mar shu sdang u bnai Ïaïong bad pynthut ki kali kiba ïaid haba dang ïaid ka jingsiang rong.
