Shillong, Ïaïong 22
U Myntri ba khmih ïa ka tnat Bording ka Jylla, Abu Taher Mondal, u la pyntip ba ka tnat kan sa bujli noh ïa kumba 1 lak tylli ki post ilektrik kiba la sarang bad ki Transformer kiba don jingthut.
Haba kren bad ki lad pathai khubor ha ka Sngi Ba-ar, u Mondal u la ong ba ka jingbujli ïa ki Transformer ba la sniew bad ki post ilektrik ba la sarang ka dei shi bynta jong ki kam ba ïai bteng na ka por sha ka por ba ka tnat ka hap ban leh bad kam dei ka kam kaba tang shisien leh.
“Kam mut ba shisien ba ngi la bujli ïa ki Transformer ne post ilektrik ka la biang noh ne ym mih jingthut shuh. Kine kijuh ki Transformer bad post ilektrik ki lah ban thut ne sniew biang namar ka jingkit palat ïa ka bording, ka jingpom pyrthat bad kiwei-kiwei. Mynta ngi lah ban bujli ïa uwei u Transformer ha kawei ka jaka bad lashai pat ka lah ban mih biang sa kawei ka jingeh ha kiwei pat ki jaka. Kumta, kane ka kam ka dei kaba ïai bteng na ka por sha ka por,” u la ong.
Haba kylli halor ki kam jong ka Revamp Distribution Sector Scheme (RDSS), u Mondal u la ong, “Haba don ka jingdonkam ban pynheh ne kylliang ïa u Transformer, ngin sa kynthup ïa kata hapoh ka skhim.”
Ha kaba ïadei bad ka jingshngaiñ khamtam ha ki jaka khlaw ba pynïaid lyngba ïa ki waïar ‘high tension’, kumba la jia shah lympat u hati khlaw dang shen ha Ri-Bhoi, na ka liang u Mondal u la ong ba ka tnat ka shim khia bha na ka bynta ka jingshngaiñ ki nongshong shnong.
“Ïa ki waïar ‘high tension’ ngi ju pynïaid na sha jrong bha bad pyndait ha ki ‘tower’, kan ym don satia ka jingleit dei briew ïa ki waïar. Lada ka don ka jingdkut jong u waïar na ka daw jong ka ‘leilieh bad kiwei ki daw, kita ki dei ba hap ban shim khia ban lait na kino-kino ki jingjia,” ong u Myntri.
