Tura, Ïaïong 22
U Auxiliary Bishop ka Tura, Jose Chirackal, ha ryngkat ka jingïasyllok bad u Bishop ka Tura, u Rev. Andrew Marak, lyngba ka kyrwoh, u la phah ïa ka jingsngewlem halor ka jingkhlad noh u Pope Francis, sha baroh ki paid ‘riewngeit ka Ri-lum Garo.
Ha ka kyrwoh, u Chirackal u la ong, “Kumba phi la tip lypa, u Kpa Bakhuid baieid eh jong ngi, u Pope Francis u la khlad noh ha ka 21 tarik Ïaïong ha ka por 11.05 baje mynstep (ha ka por India). Ka Balang baroh kawei ka don hapdeng ka por jong ka jingsngewsih kaba 9 sngi. Hadien ba la ïasyllok bad u Bishop Andrew bad kumba la ai jingmut da ka CBCI bad CCBI, la rai ba ka Diocese jong ngi ruh, kan don hapdeng ka jingïam briew kaba khyndai sngi. Ha kane ka por sngewlem kaba khyndai sngi, la kyrpad ïa baroh ki shlem treikam bad Parish jong ka Balang Katholik ban pynlong ïa ka ‘Mass’ ba kyrpang bad ki jingduwai na bynta ka jingjahthait ka mynsiem jong u Kpa Bakhuid uba la khlad noh.”
“Na ka bynta ki Lyngdoh, ki ‘riewngeit jong ka Tura, yn pynlong ïa ka ‘Mass’ ba kyrpang ha Sacred Heart Shrine ha ka por 5.30 janmiet, ha ka 24 tarik u Ïaïong. Kumta, la kyrpad ïa baroh ban ïashim bynta ha kane ka ‘Mass’ ba kyrpang bad duwai na bynta ka mynsiem uba la khlad noh,” ong ka kyrwoh.
“Lah ban ai shuti ha ka sngi tep – katkum ka jingbuh tarik na bynta ka sngi tep, ynda la pynbna ha kano-kano ka por. Katba ngi dang ainguh ïa U Blei na bynta ka jingshakri jong u Pope Francis bad sngewlem halor ka jingkhlad noh jong u, to ngin kut jingmut ruh ban sumar ïa ki jingkynmaw babha jong u, ban bud ïa ki jinghikai jong u kumjuh ban bud ïa ki nuksa babha jong u, khamtam eh ban kyntiew ïa ka jingïadei-jingïatylli, ka suk ka saiñ bad ka jingsumar ïa ka mei-mariang lem bad kito kiba kham duna ha ka imlang-sahlang,” la bynrap ka kyrwoh.
Kumjuh, ka Khasi Jaiñtia Christian Leaders Forum (KJCLF) lyngba ka kyrwoh na u Secretary, Rev. Dr. Edwin H. Kharkongor sha u Most Reverend Bishop Victor Lyngdoh, Archbishop ka Shillong Archdiocese ka la phah ïa ka jingsngewlem halor ka jingkhlad noh u Pope Francis.
