Tura, Ïaïong 22
Ka A’chik State Peoples’ Front (ASPF) ka la pynpaw ïa ka jingpyrshah jur bad jingsngewsih halor ka rai ba la pyntip da ka Sorkar ban thung biang sa shisien da u dkhot bym dei u Garo kum Chairperson ka Meghalaya Public Service Commis-sion (MPSC).
Ïa kane ka jingujor la phah sha u Myntri Rangbah ka Jylla, u Conrad Sangma.
“Kane ka sienjam ka buh jingkylli halor ka jingkular ka Jylla haba ïadei bad ka jingmihkhmat kaba ïaryngkat bad ka nongrim jong ka ‘Reservation Policy’ jong u snem 1972. Kane ka polisi, kaba long ka nongrim jong ka jingkynthup lang ha ka Jylla ka pynïapher ïa ki trai-ri trai-muluk ha ki ar tylli ki kynhun ba kongsan – ki Khasi-Jaiñtia bad ki Garo – kiba ïoh ïa ka bhah mihkhmat kaba mar 40% ha ka jingshakri paidbah bad ki jingthung kam. Ka nongrim jong ka pali kaba hok, wat la khlem pynbeit katkum ki kyndon, hynrei la ithuh bad pynskhem beit ha ka jingthung ïa u Chairperson jong ka MPSC, kum ka lad ban pyni ïa ka jingpher jong ki briew ha ka thup jingbun briew jong ka Jylla jong ngi ha ki kyrdan kam ba kham heh,” ong ka Secretary ka ASPF, ka Bernita Marak.
Ka la pynpaw ba kane ka nongrim ka la don lypa haba phai sha ka jingthung ka MPSC, ha kaba ïa 2 ngut ki dkhot la ju shim na ka jaidbynriew Khasi-Jaiñtia bad 2 ngut pat na ka jaidbynriew Garo, kaba ïa biang bad ka ‘Reservation Policy’.
“Ka long namarkata kaba don jingmut bad kaba dei hok ba kajuh ka nongrim ka dei ban synshar haba ïadei bad ka jingjied ïa u Chairperson, ban pyntikna ïa ka jingmihkhmat kaba ïabiang ha ka kyrdan ba hakhlieh duh jong kane ka tnad treikam. Ka jinglong kaba nangroi ban pynbyrngut ïa ka jinglong ba la seng ha ki ar-bynta jong ka Khasi-Jaiñtia bad Garo da kaba wanrah ïa ka jingpynïapher lai bynta (artificial three-way) ka long kaba sngew shyrkhei. Kum kane ka jingpynkylla ym tang ba ka pyrshah ïa ka phang pdeng kaba shai jong ka polisi ka snem 1972, hynrei ka paw ruh ba ka dei ka buit kaba la thmu ban pynbeit ryntih ïa ki jingthung ka bym ïahap,” ka la bynrap haba pynpaw ba ka long kaba donkam ban pyrshah ïa kum kine ki jingleh bym ïahap kiba lah ban pynduh ïa ka jingshaniah bad nang pynjylliew ïa ki jingïapher.
Ka ASPF ka la bynrap ba ka jingkhmih bniah ïa ki jingthungkam kiba la dep ka kdew shai ba ka jaidbynriew Khasi-Jaiñtia ka la bat ïa ka kam Chairman haduh khyndai sien, katba ka jaidbynriew Garo pat ka bat ïa ka shuki tang hynñiew sien.
“Kane ka rukom ka pyni ïa ka jingbym ïahap kaba mih, bad ka bym dei ban ailad ban nang heh. Ka jingthung thymmai na kajuh ka jaidbynriew kan nang pynkylla shuh-shuh ïa kane ka jingkheiñ bad kan phah ïa ka dak kaba pynduh mynsiem ïa ki briew Garo – ba ka hok jong ki ban ïoh nongmihkhmat ha ka riti synshar ka lah ban shah iehnoh beiñ,” ka la pynskhem.
“Ngi pynskhem ba ka jinglong Chairman jong ka MPSC mynta ka dei ban leit sha u dkhot jong ka jaidbynriew Garo. Ban leh lym kumta kan long ka jingpynjah burom ïa ki nongrim jong ka jingïaryngkat bad ka hok kaba pynskhem ïa ka jingthaw bad jingsynshar jong ka Meghalaya. Ngi ngeit skhem ba ka jinglong nongïalam jong phi kan pynneh ïa ka jinglong hok jong kane ka nongrim,” ka la pynpaw haba bynrap ba ka ASPF kan sdang ïa ki jingïakhih paidbah, kynthup ïa ka sienjam katkum ka aiñ, lada ka jingdawa jong ki kam urlong, na ka bynta ka hok jong ki paidbah ka Ri-lum Garo.
Kum ban shu kdew hangne, ka Sorkar Jylla ka la thung ïa u Chief Engineer ka PWD, Bah Dawhoi Langstang kum Chairman bathymmai ka MPSC.
