Shillong, Ïaïong 22
San ngut ki snar nongtuh arshaka kiba dei na ka thaiñ Pynursla, ki la shah kem noh ha ka Sngi Ba-ar ha ki pulit jong ka East Khasi Hills. La ong ba kine ki briew ki dei kiba ju donkti ban tuh ïa ki arshaka na nongbah Shillong.
Ha ka kyrwoh khubor ba la pyllait da u Superintendent of Police (SP) jong ka East Khasi Hills, Bah Vivek Syiem, u la ïathuh ba ha ka step phyrngab jong ka Sngi Ba-ar, ar tylli ki arshaka (Bike R15) ki la shah tuh na ka shnong Sunny Hills bad 3 Mer, Upper Shillong.
La ong ba mar mar halor kane ka jingjia, la pyntip sha ka kynhun ki pulit kiba ju pahara ha ka por mynmiet ha kylleng ki jaka bad la ong ba ïa ka bike kaba la tuh na Upper Shillong, ki nongtuh ki la ieh noh ha ka jaka kaba don ha Sangmein katba ïa kawei pat ka Bike la ïoh ban bat da ka kynhun pulit ha ka thaiñ Pynursla.
La ong ba ha kane ka por, uwei na ki nongtuh arshaka u la ïoh ban phet krad da kaba ryngkoh noh katba uwei pat uba la tip kyrteng kum u Nironton Tangsong, 24 snem, na Mawryngkang u la shah kem noh.
U SP u la ïathuh ba ka Special Cell jong ka EKH haba buddien ïa kane ka jingjia, ka la ïoh ban kem sa ïa ki 4 ngut kiwei pat kiba donkti ha ka jingtuh ïa ki arshaka kiba kynthup ïa u Pius Talang, 19 snem na ka shnong Pyrdiwah, u Lovingstar Surong, 18 snem na Pynursla, u Balajied Mawiong, 19 snem na Pynursla bad u Banpynskhem Mukhim, 19 snem na ka shnong Pynursla.
Kane ka kynhun ki nongtuh ka dei kaba la donkti ha ka ban tuh ïa ki thuk thuk bad la pyntip ba ha ka Sngi Balang yn ïalam ïa kine san ngut kiba la shah kem hakhmat ka ïingbishar.
