New Delhi, Ïaïong 23 (UNI)
Kum ka dak ban leh da kaba tyngeh ïa ka Pakistan hadien ka jingshah thombor ba shyrkhei ha Pahalgam ha kaba 26 ngut ki nongjngohkai pyrthei ki la ïap, ka India mynta ka sngi ka la pynbna ba ka la pynsangeh noh shuwa ïa ‘Indus Waters Treaty’, bad khang khyrdep ïa ka jaka talasi khappud jong ka Attari.
Ka India ka la pynbna ruh ïa ki nongai jingmut ka tnad ïada ha ka Pakistan High Commission ha New Delhi kum ki ‘Persona Non Grata’ bad bthah ba kin mih noh.
Ka India ka la pynduna ruh ïa ka bor jong ki High Commission – jong ka Pakistan HC ha New Delhi, bad jong lajong ha Islamabad — sha ka 30 na ka 55 ba mynta, lyngba ka jingpynhiar shuh-shuh, ka ban treikam ha lane shuwa ka 1 tarik Jymmang, 2025.
Ka Cabinet Committee on Security (CCS), kaba la ïakynduh hynne janmiet hapoh ka jingpynïaid u Myntri Rangbahduh ka ri, u Narendra Modi, ka la ïoh jingtip shaphang ki jingïadei na shiliang-sha-shiliang khappud jong ka jingthombor ki lehnoh ha Pahalgam bad kdew ba kane ka jingshah thombor ka la wan jia hadien ka jingjop jong ka jingpynlong ïa ilekshon ha ka Union Territory – Jammu & Kashmir, bad ka jingnang kiew jong ka ha ka liang ka ïoh ka kot bad ka roi ka par.
Da kaba shimkhia ïa kane ka jingthombor ki lehnoh, ka CCS ka la rai ïa kine ki sienjam harum:
(i) Ïa ka ‘Indus Waters Treaty’ jong u snem 1960 yn pynsangeh noh shuwa bad kane kan treikam mardor, tad haduh ba ka Pakistan kan kyntait shi syndon ïa ka jingkyrshan jong ka ïa ki kam lehnoh na shiliang-sha-shiliang khappud.
(ii) Ka Integrated Check Post (ICP) Attari kan khang noh mardor. Kito kiba la jam sha shiliang ryngkat ki jingpynskhem kiba biang ki lah ban leit phai biang lyngba kata ka lynti shuwa ka 01 tarik u Jymmang, 2025.
(iii) Yn ym shah ïa ki nong Pakistan ban wan sha India lyngba ki ‘visa’ – SAARC Visa Exemption Scheme (SVES). Kino-kino ki ‘visa’ SVES ba la ai ha ki por ba la dep sha ki nong Pakistan la kheiñ ba la pyndam noh ïa ki. Kino-kino ki nong Pakistan kiba don mynta ha India lyngba ka SVES ‘visa’ ki don por 48 kynta ban mih noh na India.
(iv) Ki nongai buit Defence/Military, Naval bad Air ha ka Pakistan High Commission ha New Delhi la pynbna kum ki ‘Persona Non Grata’ ne ki bym shah pdiang sngewbha. Ki don por shi taïew ban mih na India. Ka India kan weng noh ruh ïa la ki jong ki nongai jingmut (Defence/Navy/Air) na ka India High Commission kaba don ha Islamabad.
(v) Ïa ka jingkhlaiñ jong ki High Commission baroh kawei yn pynhiar sha ka 30 na ka 55 kaba mynta lyngba ki jingpynhiar shuh-shuh, bad yn pyntreikam noh ha lane shuwa ka 01 tarik Jymmang, 2025.
Ka CCS ka la khmih bniah ïa ka jinglong-jingman ka shong suk shong shngaiñ bad bthah ïa baroh ki bor pahara ban pynneh ïa ka jingpeitngor kaba jur. Ka la rai ruh ba yn pynngat ha ka aiñ ïa kito kiba donkti ha kane ka jingthombor bad ki nongkyrshan jong ki kin hap shim ka jingkitkhlieh.
Ka CCS ka la kdew ba 25 ngut ki nong India bad uwei u nongshong shnong ka Nepal ki la ïap ha katei ka jingshah thombor. Katto-katne ngut kiwei pat ki la mynsaw.
Na ka liang ka CCS ka la pynrem jur ïa kane ka jingshah thombor ha ki kyntien kiba tyngeh bad pynpaw ka jingsngewlem kaba khraw sha ki bahaïing bahasem jong kiba la khlad noh bad kyrmen skhem ba kito kiba mynsaw kin ïoh noh kloi ïa ka jingkoit jingkhiah.
