Shillong, Jymmang 13
Kawei ka longkmie na Lapangap ka la pynpaw ka jingbitar namar kiba shong ha Secretariat ki trei suk ki kdang ka kpoh katba ki paidbah ka shnong Lapangap ki la thylli ka kpoh namar kim ïoh shuh ban rep naduh ba la shah khang ha ki pulit Assam.
Kane ka longkmie ka la pynpaw katba ki dang ap ïa ki nongïalam shnong kiba dang leit ïakren bad ki bor Sorkar hapoh Secretariat.
Ka la ong ba naduh ba synshar ka Sorkar MDA-2 haba ka la mih ka jingïakajia naduh u snem 2023 ka la shu phah ap hynrei haduh mynta u snem kam shym la seisoh kumta ki paidbah kim lah shuh ban shah kim banse ban dawa ïa ka hok.
Ka la kyntu ïa ka Sorkar ba ka dei ban weng ïa u GPS Line ba dro ki Karbi ha khappud namar wat ki pulit ka Meghalaya kim nud ban leit tur shuh sha katei ka jaka.
Kawei pat ka longkmie ka la ong ba ki pulit Assam ki shong ha khappud katba ki pulit Meghalaya ki shong ha ïing ba la pynkhreh da ka Sorkar hynrei kim treh ban leit synran ïa ki nongrep namar ki shu thiah sngi bad im ha ka dih kyiad.
“Imat ka Sorkar kan sa rai ïa katei ka jaka tad ynda ki nongshong shnong ki la ïap lut haba ngim ïoh shuh ban rep,” ki la ong.
Ki paidbah kiba la wan sha Secretariat da ka jingbitar ki la pyrta ban hiar shuki noh ïa u Conrad Sangma, Prestone Tynsong bad Sniawbhalang Dhar namar kim lah ban ïada ïa ki ha khappud bad ka Assam.
Kane ka jingtur ki paidbah hakhmat Secretariat ka la pynsahkut ïa ka leit ka wan ki paidbah kiba ïaid na IGP sha Khyndailad.
