Shillong, Jymmang 13
U National President ka National People’s Party (NPP) bad Myntri Rangbah ka Jylla, u Conrad K. Sangma u la pynrem jur halor ka “jingshah pynïap ba shyrkhei bad ba khawpud” jong ki nongïalam ka Balang Baptist ha Manipur bad dawa na ka Sorkar Pdeng bad Sorkar Jylla ban leh eiei mardor khnang ba kito kiba donkti kin shah pynshitom katkum ka aiñ.
Ha ka kyrwoh, u Conrad u la ñiew ïa katei ka jingthombor ïa ki Pastor bad ki nongtrei Balang ki bym don tiar ïaleh kum kaei-kaei “kaba pynsngewsih jur bad ka bym lah ban pdiang satia ha kano-kano ka imlang-sahlang kaba la nang la stad.”
“Ki lanot, kiba dei ki dkhot ba donburom jong ka jaidbynriew Kuki Baptist bad kiba don jingïadei bad ka Manipur Baptist Convention bad ka Kuki Church Leaders Forum, ki la aiti la ka jong ka jingim sha ka jingïa-lam ba kynja mynsiem, ban tei ïa ka jingsuk, bad ka jingshakri sha ka longbriew-manbriew,” ong u Conrad.
“Ka jingpynlong sohpdung ïa kum kine ki briew kam dei tang ka jingthombor ïa ki mynsiem ba lui-lui hynrei ka dei ruh ka jingthombor kaba shyrkhei ïa ki nongrim jong ka jingïatylli, ka jingsngewrit, bad ka jingïalong kawei kaba tehsong ïa ka imlang-sahlang jong ngi,” u la bynrap.
Une u khlieh nongïalam ka NPP u la ong ba ka seng ka ïeng ha syndah ryngkat ka jingïatylli bad ki longïing kiba la mad ïa kane ka jingjia ba sngewsih bad ka Kuki Baptist baroh kawei ha kane ka khyllipmat jong ka jingsngewsih kthang.
“Ngi pynpaw ïa ka jingsngewlem bad jingduwai na ka bynta ka jingjahthait bymjukut jong kito kiba la duh noh la ka jong ka jingim, bad ngi kitbok-kitrwiang ïa ka jingkoit jingkhiah kaba kloi bad kaba pura ïa kito kiba la mynsaw ha kane ka jingjia ba shyrkhei,” u la ong.
Haba ban jur ïa ki bor ba dei peit ban leh eiei, u Myntri Rangbah u la kyntu ïa ka Sorkar India bad Sorkar Manipur ban leh eiei noh mardor bad da kaba tyngeh haba ïadei bad kane ka kam.
“Dei ban ïaid shakhmat bad ka jingtohkit kaba bniah, kaba shai, bad kaba buh por ban pyntikna ba kito kiba donkti ha kane ka kam runar la pynithuh bad pynngat ha ka aiñ khlem da pynslem. Ka jingkitkhlieh ka long kaba donkam ym tang ban pynpoi ïa ka hok sha ki lanot hynrei ban wanrah biang ïa ka jingngeit hapdeng ki jaidbynriew kiba shah ktah,” u la ong.
U khlieh ka seng u la kyntu shuh-shuh ïa ki bor ba dei khmih ban “pynkhlaiñ ïa ki lad jingïada ban pyntikna ïa ka jingshngaiñ bad jingïada ïa ki jaidbynriew kiba don jingma, khamtam ha ki jaka ba shah ktah ha ka jingïakynad.”
“Ka jingïai bteng ban pynlong sohpdung ïa ki ‘riew paidbah bad ki nongïalam ka imlang-sahlang ka pynpaw ïa ka jingdonkam kyrkieh na bynta ka jingshimkhia kaba kham khlaiñ bad ban shim ïa ki sienjam lad jingïada,” u la ong, da kaba pynkynmaw biang “ïa ka jingdonkam jong ka jingïakren, ka jingïapynbeit, bad ki jingpyrshang lang na bynta ka jingsuk.”
“Ka jingkulmar kam lah satia ban long ka lad jingpynbeit ïa kano-kano ka jingshah leh bym hok, bad kum kine ki kam ki nang pynjylliew shuh-shuh ïa ka jingïapait-ïapra bad ka jingjynjar kaba ïaineh,” la bynrap biang u khlieh ka NPP.
Shuh shuh u Conrad u la kyrpad ïa “baroh ki nongshim bynta, kynthup ïa ki kynhun seng ka imlang-sahlang, ki nongïalam shnong, bad ki nongshong shnong, ban ïawan lang ha ka mynsiem jong ka jingïatylli bad ban trei ban wanrah biang ïa ka jingsuk, jingïatylli, bad ka jingshaniah ba markylliang ha kylleng ka Manipur bad ka Thaiñ Shatei Lam Mihngi.”
