Shillong, Jymmang 13
U Myntri ka Koit ka Khiah ka Jylla uba dei ruh u nongaiktien ka Sorkar MDA, Bah Wailadmiki Shylla ha ka Sngi Balang u la ong ba ka rai jong ka National Testing Agency (NTA) ban pynsangeh noh ïa ka eksamin NEET-UG 2026 ha baroh kawei ka ri, ka long kaba pynduh mynsiem bad kaba sngewsih shi kat dei, bad kyntu ïa ka Sorkar Pdeng ban leh eiei pyrshah ïa kito kiba donkti bad ban pynshlur bad ai mynsiem biang ïa ki samla pule kiba shah ktah.
Haba jubab ïa ki jingkylli halor ka sienjam ka NTA hadien ka jingmih khubor halor ka jingkynnoh bym biang bad jinglait tuh ki jingkylli ha katto-katne ki thaiñ, u Bah Wailad u la ong, “Da shisha, ka long kaba pynduh jingkyrmen ban ïohi ïa kane. Kane kam dei tang na ka bynta ka Meghalaya; kane ka dei na ka NTA.”
“Kum u Myntri ka tnad ka koit ka khiah, nga sngew ba ka long kaba sngewsih haduh katta-katta namarba bun ki samla jong ngi ki la aiti ïa ka por bad ka jingtrei shitom jong ki, bad mynta ki hap ban ïaid biang lyngba kane sa shisien,” u la ong.
“Nga tharai ba ka long kaba sngewsih haduh katta-katta. Hynrei ngan ong aïu hi, namarba ïa kane la leh da ka NTA. Nga kwah ban ïohi ban leh da kaba tyngeh bad kiba donkti ki dei ban shah pynshitom,” la bynrap u BahWailad.
U la kyntu ruh ïa ka Sorkar Pdeng ban shimkhia halor kane.
“Ha kajuh ka por, ngi kwah ban ïohi ba ka Sorkar Pdeng ka dei ban leh eiei ban pyntikna ïa ki samla pule bad ki khun samla ka ri jong ngi,” u la ong.
Haba kylli shaphang ka jingdon ki kyrtong kiba shah ktah ha Meghalaya, u Bah Wailad u la ong, “Mynta, ngam pat don ïa ki jingtip kiba tikna, hynrei kin don bun bah na ki.”
Ka NTA ka la pynsangeh noh ïa ka eksamin NEET-UG 2026 ha kylleng ka ri hadien ka jingkynnoh bym biang bad jinglait tuh ki jingkylli kiba la paw ha ki thaiñ bapher-bapher, kaba ktah pat ïa ki lak ngut ki samla kiba angnud ban pule doktor.
