Shillong, Jymmang 13
U Deputy Commissioner (DC) ka West Jaiñtia Hills District u Abhinav Kumar Singh, IAS u la ong ba ka Sorkar Jylla ka la kular ban shimkhia bad ban pynthikna ba ki nongrep ka thaiñ Lapangap naduh ka 14 tarik u Jymmang 2026 ki lah ban leit rep ban leit riang da kaba suk khlem kano-kano ka jingsyier.
U DC u la pyntip ïa kane ka jingkular jong ka Sorkar, ka dei hadien ba la wai ka jingïalang ba la khot da u Symbud Myntri Rangbah ka Jylla u Bah Sniawbhalang Dhar ha ka jingdon ryngkat u Chief Secretary u Dr. Shakeel P Ahmed, u Superintendent of Police Jagpal Dhanoa, ki nongïalam na ka Dorbar Shnong Lapangap ryngkat ka jingdonlang ki dkhot Khasi Students’ Union ba na Ri-lum Jaiñtia.
Ka jingkhot ïakren ka Sorkar Jylla ïa ki nongshong shnong ka Lapangap kumjuh ki dkhot Sengbhalang ba kynthup ïa ka KSU, ka dei hadien ba ki la leit ban tur paidbah sha Secretariat, ban dawa ïa ka Sorkar ba ka dei ban tuklar mardor ïa ki jingeh jong ki nongrep ha ka thaiñ khappud ha Lapangap.
Haba kren sha ki paidbah ba ïalum hakhmat khyrdop Secretariat, u DC u Abhinav Kumar Singh ula pyntip ba ka Sorkar kan phah mardor ïa ki pulit SF-10 sha katei ka thaiñ naduh ka sngi Palei ter-ter ryngkat ki kynhun ïada kiba la don lypa ban pyntikna ïa ka jingshngaiñ jong ki nongrep ba kin ïoh ban rep suk kumba ju long.
U DC u la ong ruh ba ïa kane ka kam, yn sa ïakren ruh bad ki bor halor da u Myntri Rangbah bad u Symbud Myntri Rangbah, katba ka Peace Committee kan sa shong jingïalang ha ki sngi ban sa wan. U la khmih lynti ruh ba ka jingïakren bad ka Jylla Assam shen kan sdang biang tang mar ïa dep thaw Sorkar thymmai katei ka Jylla.
“Naduh lashai ka sngi ter-ter, nga ngeit skhem ba kan don biang ka shongsuk shongsaiñ bad ki kam rep kam riang ha katei ka thaiñ kan ïai bteng. Ngin pyntikna ba ki jingeh jong ki paidbah yn shimkhia ban pynbeit,” la ong u DC.
Shuh-shuh u Deputy Commissioner u la ong ba ma u bad u SP, kin sa hiar dalade ban leit jngoh ïa ka jinglong jingman katei ka thaiñ bad ban pyntikna ba ka kam rep jong ki nongshong shnong ka dei ban ïaid khlem don ba pynthut.
Katba na ka liang u SP Jagpal Dhanoa, u la pyntikna ïa ki nongshong shnong ba ki Pulit ka Jylla kin khmih bniah na bynta ban don ka jingshong shngaiñ jong ki nongrep.
Hashuwa kane, u President ka KSU Nartiang Circle u Bah Chanbor War u la ong ba ha ka jingïalang ka Dorbar Shnong bad ki kynhun sengbhalang na Ri-lum Jaiñtia, ki la pynsngew ïa ki jingeh bad ki jingdawa jong ki nongshong shnong sha ka Sorkar, ha kajuh ka por u la maham ba lada ka Sorkar kam lah ban shimkhia bad leh mardor kumba ka la kular ha ka jingïalang, ka seng kan sa nang pynjur ïa ka jingïakhih.
