Shillong, Jymmang 13
Ka Sorkar Jylla Meghalaya kan sa phah ïa ki bor pahara kaba khlaiñ naduh ka sngi Palei sha ka shnong Lapangap, West Jaiñtia Hills ban pynthikna ba ki nongrep ka shnong Lapangap ki lah ban leit rep leit riang khlem ka jingshah pynthut.
Ïa kane la pyntip da u Symbud Myntri Rangbah u Bah Sniawbhalang Dhar hadien ba wai ka jingïalang bad ki nongïalam na ka shnong Lapangap ha ka jingdonlang ki nongïalam sengbhalang, u Chief Secretary, u Deputy Commissioner bad u Superintendent of Police ka West Jaiñtia Hills.
Haba kren sha ki nongthoh khubor u Bah Sniawbhalang u la ong “Ngi la ïoh ïa ka jingïakynduh kaba seisoh bha. Nga la ai jingkular sha ki, ba ka Sorkar kan leh katba lah ban ïada ïa ki briew jong ngi bad ban pyntikna ba ka jingsuk kan neh kumba ju long”.
“Ki paidbah jong ka shnong Lapangap bad katto katne ki Sengbhalang ki la ïakynduh ïa nga halor kane ka kam ha ki khyndiat sngi ba la dep, ki la mih ki jingjia ha ka thaiñ. Ka dei ka samoi ba ki nongrep ki la sdang ïa ka rep ka riang, hynrei la don ki jingpynthut na ka liang ki Karbi,” u la ong.
U Bah Sniawbhalang u la pynshai ba ka jingïakren kam shym long halor ka kam pud bad ka Jylla, hynrei la ïakren halor ka ïoh ka kot ka kamai kajih jong ki nongshong shnong ka Lapangap bad u la ong ba ka kam pud ka dei ka kam ba hap ban shim ha ka kyrdan jong ka Jylla.
Nalor kata u la ïathuh ruh ba ki nongshong shnong ki la kyrpad ïa ka jingtuklar namar ba ki katto katne ki Karbi ki pynthut ïa ki bad ka Sorkar ka la ai jingkular ba kan phah ïa ki bor pahara kaba khlaiñ naduh ka sngi Palei, khnang ban pyntikna ba ka rep ka riang ki paidbah kan ïaid beit khlem kano-kano ka jingpynthut.
U Bah Sniawbhalang u la ong, “Ki Deputy Commissioner na baroh ar liang kin sa pynlong ïa ka jingïakren, ki la dep ïakren ha ki sngi ba la dep, hynrei dang donkam shuh-shuh ïa ki jingïakren. Namar ka Assam ka la thaw ïa ka Sorkar kaba thymmai, u Myntri Rangbah jong ngi u la ong ïa nga ba un sa ïakren ïa kane ka kam bad u Myntri Rangbah jong ka Assam.”
“Namar kane ka jaka ka don ha khappud, ngi dang ap ïa ka Sorkar Assam ban thung ïa u Chairman ba thymmai jong ka Regional Committee jong ki. Ynda la dep kata, ngin sa rai bad ïakynduh ïa ki paralok jong ngi ha ka por kaba biang,” la ong u Bah Sniawbhalang.
