Nongpoh, Jymmang 13
U Symbud Myntri Rangbah ka Jylla uba khmih ruh ïa ka tnad PWD Bah Prestone Tynsong ha ka sngi Balang u la plie paidbah ïa ka jingkieng bad surok thymmai ha Umiam na ka bynta ban pynïaid ïa ki kali heh ki bym ïoh shuh ban ïaid na ka jingkieng rim jong ka dam hadien ka jingmaramot ha kine ki khyndiat snem ba la dep.
Ha kane ka sngi la sakhi ruh ïa ka jingdon ryngkat u MLA ka Umroi Bah Damanbait Lamare, u Commissioner & Secretary ka tnad PWD u Sanjay Goyal, ka Deputy Commissioner ka East Khasi Hills Kong RM Kurbah, u Chief Engineer ka PWD Bah WR Lyngdoh, u SP ka East Khasi Hills Bah Vivek Syiem, u SP ka Ri Bhoi u Giri Prasad, ka Kong Balakyntiew Rani, Additional Deputy Commissioner ka Ri Bhoi nalor kiwei-kiwei.
Kumban shu ïathuh hangne, ïa kane ka jingkieng bad ka surok thymmai kaba la shna kham harum jong ka jingkieng rim ka dam, la shna lyngba ka skhim Special Assistance to State Capital Investment ha ka jinglut kaba T.23 klur.
Haba ai jingkren ha kane ka sngi, u Bah Prestone u la ong ba ka jinglah ban plie paidbah noh ïa kane ka jingkieng bad ka surok thymmai, kan long ka jingmyntoi kaba khraw na ka bynta kito ki kali kit mar kit mata lem bad ki bos kiba hap ïaid lyngba kane ka surok ba kin lah ban poi sha nongbah Shillong.
U la ïathuh ruh ba ka jingsdang ban ïaid ki kali lyngba kane ka surok thynmai kan sdang naduh lashai ka sngi, kata ka 15 tarik u Jymmang 2026 bad ki kali kiba lah ban ïaid ki dei tang kito kiba la pynmih kyndon da ka ophis jong ka Deputy Commissioner ka East Khasi Hills, bad kyntu ïa ki paidbah nongleit nongwan lyngba kane ka surok ba kin bud ryntih ïa ki kyndon khnang ba kan nym mih kano kano ka jingjia ba sngewsih hadien habud.
U Bah Prestone u la pyntip ruh ba ka Sorkar ha ka mang tyngka jong u snem 2025-26 kala mang pisa ym duna ïa ka T.2400 klur na ka bynta ban shna ïa ki surok bapher-bapher ha kylleng ka Jylla kiba yn sa pyntreikam noh shen ha kine ki khyndiat por ki ban sa wan.
Ha kaba ïadei pat bad ka jingpynheh ïa ka surok na Lad Umiam sha nongbah Shillong, u Bah Prestone u la ïathuh ba halor kane ka bynta, ka tnad PWD ka Jylla kala aiti ha ka NHIDCL na ka bynta ban pyntreikam ïa katei ka surok thymmai.
Shuh shuh, u Bah Prestone u la ïathuh ruh ba katkum ka jingthmu jong ka Sorkar Jylla hi ka long ban shna ïa ka surok saw lain (4-Lane) naduh na Lad Umiam ter ter shaduh sha nongbah Shillong bad lada kane kam long ruh, yn shna da ka surok ar lain (2-Lane) kaba bit ba biang na ka bynta ban pynsuk ïa ki paidbah nongleit nongwan bad shen na ka liang ki bor ba dei khmih ka jylla ha kine ki khyndiat sngi ban sa wan kin sa shong jingïalang bad ki bor ka NHIDCL ha nongbah Delhi na ka bynta ban shim ïa ka rai kaba khatduh.
