Shillong, Ïaïong 23
Ka VPP Youth Wing ha ka Sngi Ba-ar ka la leit ban ïakynduh ïa u MS ka Meghalaya State Pollution Control Board (MSPCB) ha ophis jong ka ban kyrpad kynriah noh ïa ka tarik eksamin LDA jong ka namar ka ïatyngkhuh bad kajuh ka sngi bad por bad ka eksamin kam ka Directorate of Economics & Statistics kaba la buh ha ka 26 tarik Ïaïong 2025 namar ka buh jingeh ïa ki samla wad kam kiba thmu ban ïaleh ïa kine baroh ar eksamin.
U Member Secretary ka MSPCB, Bah G Chyrmang u la kular ban ïakren bad ka MPSC halor kane ka bynta.
Ka seng ka kyntu ruh ïa ki ophis bapher bapher ka jylla ba kin da wad bniah bha ki tarik eksamin shwa ban pynbna kumne ban ym pynjynjar ïa ki khynnah samla kiba thmu wad kam wad jam.
Na ka liang ka Youth Wing haba kylli na u MS ka MSPCB, balei ki la pynlong ïa ka eksamin ha kajuh ka sngi namar kan buh jingeh shibun ïa ki khynnah wad kam, khamtam kiba sah sha ki district ba jngai? Kaba sngewthuh lypa ruh ba kin hap jied shong hi tang kawei ka eksamin bad ha kane ka juk kyrduh kam kan long ka jingduh nong ïa ki hi.
Kum ka wing ba peit khmih bha ïa ka khia ka shon ki khynnah pule, ki khynnah wad kam bad kiwei kiwei de ki mat, ka Youth Wing ka sngew ba kane ka jingleh thurmur ka long ka jingduhnong jong ki khun samla ka jylla bad ka kyntu ba ki bahalor kin da peit bniah shwa ban pynlong eksamin nangne shakhmat.
