Mendipathar, Ïaïong 23
U MDC ka Rongrong, Rinaldo K Sangma ryng-kat bad u President jong ka Meghalaya Pradesh Youth Congress (MPYC) u Timjim Momin ha ka sngi Balang ki la leit ban jurip ïa ka karkhana PepsiCo hadien ka jingïoh jingujor na ki trai shnong kiba trei ha kane ka kompeni, kiba la kynnoh ba ka kompeni ka la thung briew tang da kiba la phah jingmynjur da ki MLA ka NPP.
La ong ba na ka liang ka kompeni ruh hadien ka la phla ba ka la shah pynbor ha ki MLA bad ha kaba ki la kohnguh ïa ki katto katne ki jingdawa bad ong ruh ba ka jingthep kam nangne shakhmat kan long noh katkum ki kyndon bad ban ym thep kam shuh da ka jingshah pynbor hano-hano.
U Rinaldo u la pyntip, “Ma nga ryngkat bad u Timjim Momin ngi la leit ban jurip ïa ka karkhana hadien ba ngi la ïoh pdiang bun ki jingujor na ki nongshong shnong ka Mendipathar bad Resubelpara ba tang ki kyrtong ba la ai jingithuh bad mynjur da ki MLA NPP na ka thaiñ lane kito kiba dei na ka seng, ki shah thung ha ki kam kiba bun.”
Utei u MDC ryngkat bad kiwei ki la ïakynduh ruh ïa u HR Manager jong ka karkhana. Hadien ka jingtohkit, u la phla ba ka la don ka jingshah pynbor na ki MLA ka thaiñ hynrei u la ai ka jingkular ba ki jingthep kam nangne shakhmat yn sa leh khlem da shah liang hynrei ha ka rukom kaba dei.
“Ngi la dawa ba na ka bynta ki kam ba lait, bad ki skilled bad unskilled, dei ban thung shispah na ka shispah na North Garo Hills. Ngi la buh ka jingmaham ruh ïa ki heh jong ka karkhana ba ym dei ban leh shiliang khmat. Ki briew jong ka PepsiCo ki la ong ba ki la khot aplikeshon ruh na ki trai shnong kiba don ka mon ban trei ha kane ka karkhana bad ka la ai mynsiem ruh ïa ki samla ban aplai na ka bynta kane,” la ong u MDC.
