Shillong, Ïaïong 23
Ka Jylla Niambah Shillong ka la pynbna ba kan pynlong ïa ka Mass Bakhuid ha Ïingmane Bah Laitumkhrah bad ha ki Parish bapher-bapher ha ka por 10:00 baje mynstep ha ka Sngi tep ïa u Kpa Bakhuid, Pope Francis, ha ka 26 tarik Ïaïong.
“Ha ka sngi tep ïa u Kpa Bakhuid, Pope Francis, yn don ka Mass Bakhuid ha Ïingmane Bah Laitumkhrah bad ha ki Parish ha ka por 10:00 baje mynstep,” ong ka kyrwoh.
Ka kyrwoh ka ong ruh ba ki parabangeit ki lah ban shim bynta lang ha ka Mass Bakhuid lyngba ki ‘YouTube Channel’ bad telibishon ban tep ïa u Kpa Bakhuid, Pope Francis ka ban long ha Vatican ha ka por 1:30 mynsngi.
Ha ka Sngi Balang, ha ka por 9 baje mynstep (ka por ha Rome) lane 12:30 mynsngi (ka por India), hadien ka jinglehniam ïa kaba la pyndep da u Reverend Eminence Cardinal Kevin Joseph Farrell, la rah ïa ka met u Pope Francis na ka ïingmane jong ka Domus Sanctae Marthae sha ka Ïingmane Bah jong u Petrus Bakhuid katkum ka rukom ba la bthah da ka riti lehniam ban tep ïa u Kpa Bakhuid, ka ‘Ordo Exsequiarum Romani Pontificis’ (Rite of Burial for Roman Pontiffs).
Hadien ka jinglehniam, yn sa sdang ka jingjngoh khatduh ïa ka met jong u Kpa Bakhuid.
Kan don ruh ka jinglehniam ha duwan jong ka “Confessio”, u Cardinal Camerlengo un sa pyndep ïa ka jinglehniam bad yn bud da ka jingleit jngoh ïa ka met jong u Kpa Bakhuid.
Ha ka sngi tep ïa u Kpa Bakhuid, Pope Francis, ka ban long ha ka Sngi Saitjaiñ, ha ka por 10:00 baje mynstep (ka por ha Vatican), lane 1:30 mynsngi (ka por India), kan don ka Mass Bakhuid ha ka madan kaba hakhmat jong ka Ïingmane Bah u Petrus Bakhuid ha kaba yn sa pyndep ïa ka jinglehniam da u Cardinal Giovanni Battista Re, u Dean jong ka kynhun ki Cardinal ryngkat bad ka jingïashim bynta jong ki Patriak, ki Cardinal, ki Archbishop, ki Bishop, ki khlieh jong ki ri bapher-bapher bad ki paid ‘riewngeit ba bun.
Ka 26 tarik, Ïaïong ka dei ruh ka sngi banyngkong jong ki khyndai sngi ka jingïam na bynta ka jingkhlad noh jong u Kpa Bakhuid, u Pope Francis.
Katkum ka jingthrang u Pope Francis, yn tep ïa u ha ka Ïingmane Bah bakhraw jong ka Maria ha Rome.
Ïa ki Kpa Bakhuid la ju tep ha Vatican hynrei hadien 300 snem tam, yn tep ïa u Pope Francis ha kane ka Ïingmane Bah bakhraw ha Rome.
Ha ka Jylla Niam Bah Shillong, kan don ka Mass Bakhuid ha ka 23, 24 bad 25 tarik Ïaïong, 2025 ha ka Ïingmane Bah, Laitumkhrah ha ka por 5:30 janmiet bad man ka sngi ha ki Parish jong ka Jylla Niam Bah Shillong katkum ka por ba pynbeit ki Parish.
