Shillong, Ïaïong 23
Ka kynhun jong ka District Child Protection Unit (DCPU) jong ka Mandya District na ka Jylla Karnataka kaba la ïalam da ka District Child Protection Officer ka Rashmi S, ka la wan ban aiti noh ïa ki 22 ngut khynnah na Meghalaya sha ka tnat Social Welfare jong ka Sorkar Jylla ha ka sngi Balang jong ka 23 tarik Ïaïong, 2025 hadien ba ka la mih ka jingjia ba sngewsih kaba la ïalam shaduh u pud ban duhnoh ïa ar ngut ki heprit kiba leit ban pule sha katei ka Jylla. Kum ban shu kdew hangne, ar ngut ki heprit na Meghalaya kiba kynthup ïa u Namebantei Marwein, 12 snem ka rta bad u Khrehlang Khongtani, 13 snem ka rta ki la duh noh ïa la ka jingim, katba katto katne ngut kiwei pat ki la shah sumar ha ki jaka sumar hadien ba ki la bam ïa ka jingbam kaba sah ha ka 14 tarik u bnai Lber, 2025 kaba ki la ïoh na ka jaka pule kaba ki sah kaba la tip kum ka Gokul Educational Institution kaba don ha ka shnong T. Kagepura Village ha Mallavali Taluk of Mandya District, Karnataka.
Ki don 24 ngut ki khynnah na ka Jylla Meghalaya kiba la leit ban pule ha katei ka jaka kiba dei na kylleng ki distrik jong ka Jylla. Katkum ka aiñ Juvenile Justice Act, ïa kitei 22 ngut kiba dang sah la buh hapoh ka jingsumar jong u District Child Protection Officer haduh ba kin da wanphai biang sha Meghalaya.
Ka jingïoh wan phai noh jong kitei ki khynnah ka dei hadien ka jingbthah jong ka Karnataka High Court, kaba la pynmih ha ka 11 tarik u Ïaïong.
Ha kane ka jingaiti ïa kitei ki khynnah kaba la long hapoh ka Conference hall jong ka Directorate of Social Welfare, la ïashim bynta lang da u Myntri ka Tnat Social Welfare ka Jylla, Bah Paul Lyngdoh, Chairperson ka State Commission for Protection of Child Rights (MSCPCR), Agatha K. Sangma, ka Director ka Tnat Social Welfare, Kong C.D. Lyngwa, ki kmie-ki kpa, ki bahaïing-bahasem jong kitei 22 ngut ki khynnah nalor kiwei-kiwei ki ophisar.
Haba kren sha ki lad pathai khubor, u Bah Paul Lyngdoh u la ong ba ïa ka jingwanphai jong ki khynnah la pynïaid da ka jingtrei shitom jong ka Director jong ka Tnat bad ki ophisar bad 3 ngut ki ophisar ka Jylla kiba la synran lang ïa kine ki khynnah na Karnataka.
U Bah Paul u la ong mynta ba kitei ki khynnah ki la iehnoh ïa ki jingpule jong ki shiteng, ka Tnat Pule-Puthi ka la pynthikna ba ki donkam kumba 2-3 sngi ban pyndep ïa baroh ki jingdonkam bad nangta kin sa pynthikna ba ïa kine ki khynnah baroh kin ïoh rung ha ki skul ba la pynïaid da ka Sorkar ha ki jaka kiba don hajan ka jaka sah jong ki hi.
“Ha ki katto-katne ki khep, ki kmie ki kpa ki dei ki nongbylla sngi, kaba mut ba ki ïai bteng ban kynriah jaka na kawei ka jaka sha kawei pat bad ha kum kine ki khep ruh, ngin sa ïoh ïa ka jaka sah kaba dei jong ki bad ban pynthikna ba kin ïoh ban pynrung kyrteng ha ki skul kiba don hajan bad katba ki leit ban kynriah jaka, ki hap ban ai jingtip lypa ïa ngi khnang ba ngin pynsuk ïa ka jingpdiang jong ki hadien na kawei ka jaka sha kawei pat”, ong u Bah Paul.
Shuh-shuh, u Bah Paul u la ong ba kine ki kmie ki kpa haba ki la rai ban phah skul ïa ki khun jong ki sha Karnataka, ki la leh ïa kata lyngba kawei ka seng treimon sngewbha, kaba don ha Jowai, West Jaiñtia Hills District, bad ka jingïakren kaba la sdang ka long hapdeng ki nongïalam jong ka seng treimon sngewbha bad ki kmie ki kpa, kumta kam don jingïadei eiei bad ka Sorkar.
“Kam don bynta eiei bad ka Sorkar bad ki khlem pan jingïarap ne jingmut na ka Sorkar haba ki phah ïa la ki khun hynrei ka dei tad haduh ynda la jia kane ka jingjia ba sngewsih ba kin sa pyntip sha ka Sorkar Jylla”, ong u Bah Paul.
Shuh-shuh, u Bah Paul u la ong ba ka jingai jingmut jong ka tnat ka long ba wat lada kum kine ki khynnah ki donkam ban bteng ïa ka jingpule jong ki shabar ka jylla, ki dei ban wad jingïalam bad jingïarap kaba biang na ka sorkar Meghalaya bad katba ka jingpule jong ki ka long kaba la bthah na ka Jylla.
