Shillong, Ïaïong 23
Ki kam tuh kam thiem ki nangjur katba nang ïaid kawei ka sngi sha kawei pat khamtam lei ka jingshah tuh jong ki arshaka bad ka jingshah prong tuh jong ki ïing. Kane ka la pynlong ïa ki trai ïing ne ki trai jong ki kali bad arshaka ban ym sngew shngaiñ shuh.
Katkum ka khubor kaba la ïoh na ki pulit la ong ba ka Kong Antalin L Nongbri ka la ai ka jingujor ba ha ka 19 tarik mynta u bnai, ha ka por kumba 2.38 shiteng synñia, uwei u runar bym lah ban ithuh dur, u la prong tuh hapoh ka dukan jong ka, kaba don ha ka shnong Pyndengnongbri ha Eastern West Khasi Hills bad ban tuh ïa ki tiar ki tar kiba shongdor haduh kumba T.39,606/-. Ïa kane ka jingjia baroh, la ïoh ban ringdur hapoh ka kor CCTV.
Ha kawei pat ka jingjia, u Bah Tuberlin Thongni u la ujor ba ha ka janmiet jong ka 20 tarik mynta u bnai, ki runar bym lah ban ithuh, ki la tuh ïa ka ksiar, ka pisa 5,000/-, ar tylli ki ATM card, ki kot ki sla ba donkam na ka ïing sah jong u ha Pyndengrei, West Khasi Hills.
Katba ka Kong Patricia Kharumnuid ka la ujor ba hapdeng ka miet 21 bad 22 tarik mynta u bnai, ki runar bym lah ban ithuh, ki la tuh ïa ka arshaka jong ka kaba don ïa u registration number ML05-AA-5575 na Sawmer, Upper Shillong. La ong ba kham hadien ïa kane ka arshaka, la lap ba la ieh noh hadien jong ka ophis treikam ka tnat Forest ha Upper Shillong.
Ha kawei pat ka khubor, u Sumit Sunar u la ai ka jingujor ba ha ka 26 tarik jong u bnai Lber, ki runar bym lah ban ithuh, ki la tuh ïa uwei u RRU uba shongdor kumba T.2,49,046/- na kawei ka mobile tower kaba don ha Nongrah Pdeng, Shillong.
