Nongstoiñ, Jymmang 01
Ha ka step jong ka 1 tarik mynta u bnai, u slap bad phria uba jur bha u la ther ha ki katto katne ki bynta ha kaba kiba bun ki ïing ki sem kynthup ïa ka ïing skul jong ka skul BPL Secondary Mawkadiang, ki jingthung jingthep hapoh ka shnong Mawkadiang ha West Khasi Hills ki la julor.
U Bah Paisingh Lyngdoh Puwein, Sordar ka shnong Mawkadiang u la ong ba katei ka jinghap jong u phria ka la sdang ha ki por kumba 9.30 mynstep bad ka la neh kumba 45 minit eiei.
Shuh shuh u la ong ba haduh mynta ka shnong ka dang lum jingtip ban pynthikna katno tylli ki ïing kiba la shah ktah hynrei katkum ka jingïoh lum malu-mala ka jingtip ka la poi sha ki phew tylli, kynthup ïa katei ka ïing skul.
U Sordar u la ong ruh ba ka shnong halor katei ka jingshah ktah ki ïing ki sem, ka la dep pyntip ruh sha ka ophis jong ka Nongstoiñ C& RD Block.
Kumjuh haba phai sha Eastern West Khasi Hills District, ha kane ka juh sngi ki paidbah nongshong shnong bad ki nongrep ki la mad ïa ka jingsngewrit mynsiem kaba jur na ka jingther u phria uba jur bha ha ryngkat u slap, ka ‘erïong ha kaba bun ki ïing ki sem bad skul, ki jingthung jingtep, ki soh ki pai, ki jhur ki jhep ki la julor.
Katkum ka tyllong khubor ba la ïoh ban lum, ki nongshong shnong kiba la mad ïa katei ka jingshah ktah ki kynthup kum ha ka shnong Nongthymmai, Thangmaw, Mawblei, Mawkohmit, Rikhen, Maroid bad kiwei ki shnong ba marjan.
Shuh shuh ka khubor ka ong ruh ba ha kitei ki thaiñ ka jinghap u phria uba jur bha ka la sdang ha ka por 11 baje mynstep ha ki thaiñ Thangmaw bad ha ka por 1 baje duna ha ka thaiñ Mawkohmit uba la wan ha ryngkat u slap bad ka ‘erïong.
Nangta, la ong ruh ba u phria u la ther ïa ki bynta jong kitei ki shnong ha kaba ki jingthung jingtep baroh naduh u sohplom, sohniamtra, u biskot, sohshaw u sohmynken, ki jhur u motor u phan bad kiwei ki jait jingthung ki la julor lut nalor ki ïing briew ha kaba ki tin sop ïing ki la pei.
Ka tyllong khubor ka ïathuh ruh ba halor kane ka jingshah ktah jong ki mar rep, bad ki ïing ki sem na ka liang ki Sordar shnong ki la dep ban pyntip mar mar sha ka ophis jong ka tnat ka rep ka riang ka district bad ha u BDO Mairang Block ba kin wan jurip bad shim jingkheiñ ïa ki lanot ba la shah ktah ha katei ka jingwan lynshop jong u phria.
