Shillong, Jymmang 04
Ka Meghalaya SSA School Association (MS-SASA) Sengkmie ha ka 3 tarik Jymmang, 2025, ka la pynlong ïa ka jingïalang bah na ka bynta ban pynshai halor ki mat jingïakren kiba la dep ban ïakren bad ka Sorkar.
Haba kren sha ki lad pathai khubor, u Bah Aristotle Rymbai u ba dei u President ka Meghalaya SSA School Association (MSSASA), u la ong ba ki don shibun ki mat kiba la ïoh ban pynshai ha kane ka sngi kiba kynthup ha kaba ïadei bad ka jingaiti noh ïa ka bor pynïaid ïa ki skul SSA sha ka Sorkar kiba pynïaid da ki Dorbar Shnong, ki skul ñiam bad ki riew shimet.
Shuh-shuh, u Bah Aristotle u la ong ruh ba ka kynhun ka la ïoh ban ïakren ha kaba ïadei bad ka skhim kaba thymmai ba la wanrah da ka Sorkar Jylla ïa kaba la tip kum ka Meghalaya Edu-cation Grant na ka bynta ban pynbeit ïa baroh ki kynrum-kynram kiba kynthup ïa ka jingpynkiew ïa ka pule-puthi hapoh ka jylla ne ka Performance Grading Index (PGI) ka ban kynthup lang ïa ki skul Adhoc, ki skul Deficit, ki Fourth Teacher, ki skul SSA ki bym aiti sha ka Sorkar bad kiwei-kiwei ha kaba kin ïoh ïa kajuh ka jingmyntoi.
“Ka Sorkar Meghalaya mynta lyngba ka tnat Pule-Puthi, kala don ka jingthmu ban wanrah ïa kane ka skhim bathymmai kaba la ai kyrteng ka Meghalaya Education Grant (MEG) ïa kaba kan kynthup lang ïa baroh ki skul Grant-in-aid la ki dei ki skul Deficit, Adhoc, Fourth Teachers ne ki SSA ki bym don ka mon ban aiti ïa ka bor pynïaid sha ka Sorkar ha kaba yn kynthup lang hangne bad kine baroh kin ïoh ïa kajuh ka jingmyntoi”, ong u Bah Aristotle.
U la ong ruh ba na ka liang ka Sorkar ka la ai por haduh ka 31 tarik mynta u bnai Jymmang ba ki nongpynïaid bapher-bapher jong ki skul kin wan ban ai jingmut lane kin pynpaw ïa ka jingsngew jong ki halor kane ka jingthmu jong ka Sorkar ban wanrah ïa kane ka skhim bathymmai.
