Tura, Jymmang 04
U MDC ka BJP na Tura, Bernard Marak u la kyrpad ïa ki bor ba dei khmih ka Jylla na bynta ki jingtalasi kiba pyrkhing ban khang pyrshah ïa ka jingwan rung be-aiñ jong ki briew na Bangladesh kumjuh na Pakistan.
Lyngba ka kyrwoh sha ki lad pathai khubor, u Marak u la pynpaw ba ha kine ki phew snem ba la dep (ha ka por ka Congress), ka Thaiñ Shatei Lam Mihngi, khamtam ka Ri-lum Garo, ka la sakhi ïa ka jingkylla kaba khraw ha ka jingbun briew ha kaba kiba bun na Bangladesh (East Pakistan) ki la wan shong shnong ha ki jaka thor bad ha katto-katne ki jaka lum.
“Kane ka jingwan buhai shnong-bunsien kaba be-aiñ-ka la ïalam sha ka jingkiew sted ha ka jingbun briew, kaba ktah ïa ki jingdon-jingem jong ka thaiñ bad ktah ruh ïa ka jingïabiang ha ka imlang-sahlang bad ka saiñ pyrthei jong ka thaiñ. Ha ka histori, ki la don ki jingbym biang ha ka mon saiñ pyrthei bad ki rukom synshar kiba la kynnoh ba ki la pynsuk ïa ka jingshong shnong bad wat ban pynlong aiñ ruh ïa kum kine kiba wan buhai shnong. Namar kane, ki jaidbynriew ‘riewlum jong ka thaiñ, khamtam ha Ri-lum Garo, ki la mad ïa ka jingshah kyntur pud ha ki jaka trai-ri jong ki, ka jingpyntlot ïa ka snap kolshor, bad ki jingeh ha ki hok imlang-sahlang bad saiñ pyrthei jong ki, kynthup ha ka shongkha shongman bad ki riti-dustur bat khyndew,” u la ong.
Ban pynbeit ïa ki jingbakla, u Marak u la kyrpad na bynta ka jingpynshisha bad jingpynïasoh ‘Aadhaar’ bad ‘EPIC’ (Voter Id), ka jingïaid shakhmat bad ka rukom treikam kaba khlaiñ da ka Sorkar bad GHADC ban pynithuh bad khmih bniah ïa ki jingai jaka ba la ai sha ki briew kiba ka jinglong nongshong shnong jong ki kam shai bad ban pynjur ïa ka jingpeitngor bad jingïatreilang hapdeng ka Sorkar Jylla bad Sorkar Pdeng ban khmih ïa ka ïaid ka ïeng na shiliang-sha-shiliang khappud bad ban khang ïa ka jingwan buhai shnong be-aiñ.
“Ha ka synshar paidbah, ka jingkhlaiñ ha ka jingkheiñ ka ktah ïa ki jingmih ha ka saiñ pyrthei bad ka long kaba donkam ba ki nongshong shnong ba shisha kim dei ban shah pynduh noh ïa ka hok ban ‘vote’ ne ban shah tyllep ha ka jingbun namar ka jingdon jong ki briew ki bym don kot don sla. Ngi dei ban ïada ïa ki hok jong ki jaidbynriew trai-ri trai-muluk da kaba pyntikna ba ki thup kyrteng thep ‘vote’ bad ki kot ki sla jong ki jaka ki long kiba tikna bad kiba lait na ki jingrung be-aiñ,” u la bynrap ha ryngkat ka jingkyrpad ïa baroh ki nongshong shnong ba dei hok ban ïatylli ha kaba ïada ïa ka thaiñ.
