Shillong, Jymmang 04
U Nongïalam ka Liang Pyrshah ha Khasi Hills Autonomous District Council (KHADC), Bah Titosstarwell Chyne uba dei u MDC ka UDP na Sohra Konstitwensi u la ong ba balei ka Voice of the People Party (VPP) ka kwah sa ïa u MDC shu sieh haba ka la ïoh haduh 17 ngut ki MDC kaba la synshar marwei ha KHADC.
Kane ka jingpynpaw u Bah Titosstarwell ka dei haba u nonglum khubor u la ïoh ban ïakren hadien ba ki MDC ka VPP hapoh ka jingïalam u CEM ka KHADC Bah Shembor-lang Rynjah, ki la leit tyrwa ïa ka kyrteng jong u Bah Mathew Keneth Makdoh ban thung kum u MDC shu sieh hakhmat u Lat ka Jylla ha ka 2 tarik Jymmang 2025.
U Bah Titosstarwell u la ong ba ki MDC ka Liang Pyrshah naduh ka UDP, NPP, HSPDP bad ki MDC shimet ki khlem tyrwa ïano-ïano hynrei ki shaniah beit ha ka jingpynïaid ka Sorkar Jylla.
U la pynpaw ba ha ka jingtip jong u ban thung ïa u MDC shu sieh ha ki Autonomous District Council, la leh beit da ka Sorkar Jylla hynrei um tip pat ïoh lehse mynta u lah ban thung beit-beit da u Lat ka Jylla.
U la pynkynmaw ha ka por ba ka UDP bad ka NPP ka ïalam ïa ka EC ha KHADC ki snem ba la dep, dei ka Sorkar Jylla kaba tyrwa ïa ka kyrteng u MDC shu sieh bad u Lat ka Jylla u ai jingmynjur bad la wanphai biang sha ka Sorkar Jylla ban ai ka jingpynbna.
“Haduh mynta ngam don jingtip eiei la ka Sorkar Jylla ka la tyrwa ne em ïa ka kyrteng u MDC shu sieh sha u Lat ka Jylla namar ngim kwah ban tuklar ïa ka kam jong ka Sorkar,” u la ong.
Shuh shuh u Bah Titosstarwell u la ong ba ha ka jingshisha um sngew donkam shuh ban thung ïa u MDC shu sieh ha KHADC namar ïa ka Executive Committee la synshar marwei da ka VPP kaba don haduh 17 ngut ki MDC namar lada thung ïa une u MDC shu sieh, la shu pynsyrwa kai ïa ka pisa paidbah.
