Shillong, Jymmang 04
Ki nongïalam shnong jong ka Mawlai Nongpdeng kiba kynthup ïa u Rangbah Shnong, Bah Kitkupar Kharshïing, Secretary, Bah Lambok Marbaniang lem bad ki nongshong shnong, ha ka 2 tarik u Jymmang, 2025, ki la leit ban ai khublei kyrpang ïa u Myntri ka Tnat Public Works Department (PWD) Bah Prestone Tynsong uba la lah ban pynurlong ïa ka jingshna ïa ka surok shnong kaba jngai 580 metre kaba dei ka surok kaba ki paidbah nongshong shnong ki la angnud la slem bha.
Na ka liang ka shnong ka la pynpaw ba ka dap da ka jingsngewnguh kaba khraw ïa ka Sorkar Jylla kaba la pynurlong ïa ka jingangnud bad ban pynïoh ïa katei ka surok ha ka jinglut kaba T. 4 klur 50 lak.
Haba kren sha ki lad pathai khubor bad ban pynpaw ïa ka jingsngewnguh halor katei ka jingïoh ïa ka surok, u Bah Lambok Marbaniang, u la ong ba ka shnong ka la ju ïai pynsngew halor kane ka jingdonkam ïa katei ka surok sha kiba bun ki nongmihkhmat hynrei ym ju don ba lah ban leh eiei satia bad ki la kut tang ha ka jingai jingthoh bad ong ba ka dei ha ka por ba long MDC u Bah Teibor Pathaw ba yn sa lah ban ïoh ïa katei ka surok kaba ïaid lyngba ka Block-A bad sha Block-C.
“Ngi pynpaw ruh ka jingsngewnguh ïa u Bah Teiborlang Pathaw uba la long u MDC ha kato ka por bad na ka liang ka Dorbar Shnong ngim lah khlem da pynpaw ka jingsngewnguh ïa u Bah Teiborlang Pathaw namar ka dei lyngba jong i ba ngin sa ïoh ïa ka surok bad wat la ki don ki nongmihkhmat kiba ngi lah pynsngew hynrei ki kut tang ha ki jingpynsngew”, ong u Secretary ka shnong.
Shuh-shuh, u Secretary u la ong ba kane ka surok ka dei kawei na ki surok kaba la sahteng la slem bah bad ong ba ka dei lyngba u Bah Teiborlang Pathaw ba ki jingangnud jong ki baroh yn sa lah ban pynurlong.
Utei u Secretary u la pynpaw ruh ka jingsngewnguh ïa ka Executive Committee jong ka Dorbar Shnong ka Mawlai Nongpdeng bad ruh ïa ki Ophisar, ki Enjiñiar bad ki nongtrei jong ka Tnat PWD (Roads) haba ïadei bad kane ka jinglah ban pynurlong ïaka jingangnud ki paidbah.
U Secretary u la ïathuh ruh ba ka jingjrong jong katei ka surok ka dei 580 metre bad kaba la dep ban maramot ka long 220 metre bad kaba dang sah ban maramot ka long 360 metre.
