Shillong, Jymmang 04
U Inspector General (IG) ka BSF Meghalaya Frontier, u OP Upadhyay, u la pynpaw ba ki bor pahara ha khappud ki la shim ïa ki lad ki lynti kiba paka ban khanglad ïa ka jingwan rung beaiñ na Bangladesh ha shi lynter khappud ka Meghalaya.
U Upadhyay u la kyntait ban ïathuh ïa ki buit treikam kiba kyrpang ba la pyndonkam ban tehlakam ïa kiba rung be-aiñ hynrei u la pynthikna ba ki BSF kin ïatreilang bad kiwei pat ki tnat treikam.
U la ong ba da ka jingïatreilang bad ïasngewthuh jingmut kaba pura na ki tnat bapher bapher, ki la lah ban pynduna ïa ka jingwan rung tuh haduh 70% ha ki katto-katne ki jaka ha kine ki ar ne lai bnai.
U la pynpaw ba ki BSF ki shim ïa ki lad ki lynti kiba kynthup ïa ka jingithuh bad kem ïa ki nongkhaïi ki nong India bad ki nong Bangladesh ban pyrkhing ïa ki jingïaid lynti be-aiñ.
Shuh shuh u la ïathuh ba ki la ai jingtip kaba bniah halor ka jingdon jong ki nongkhaïi be-aiñ sha ki bor ba dei peit ba kin lah ban ïakhun pyrshah ïa ki.
U Upadhyay u la kdew ba ki BSF ki la dep tip lut ïa ki lynti rung tuh ba ju pyndonkam khnang ban khanglad ïa ka jingrung khlem jingïoh jingbit.
U IG jong ka BSF u la ïathuh ba mynta ki la bujli noh ïa ki da ki kor pynshai kiba mynshwa, kiba la pynbha shibun ïa ka jingïohi bad ïarap ïa ki ha por ba ki ïaid pahara ha ka por mynmiet.
Shuh shuh u la ïathuh ba ki BSF ki ïatreilang bad ki pulit ka thaiñ ban pynlong ïa ka jingpahara lang.
