Shillong, Jymmang 04
Ha ka sngi Saitjaiñ, ki shipai Border Security Force (BSF) ki la ïoh ban kem noh ïa san ngut ki nong Bangladesh kiba la wan rung tuh shapoh u pud u sam jong ka ri India lyngba ka Jylla Meghalaya.
Katkum ka kyrwoh, 2 ngut na kine ki nong Bangladesh kiba dei na Sunamganj District, la ïoh ban kem da ki BSF ka 193 Bn na khappud ka East Khasi Hills.
Kine ki briew ki la phla ba ki la rung tuh sha khappud ban wan wad kam wad jam ha India. Ïa kine ki briew la aiti noh sha ki pulit ka thanat Dangar ban leh ïa kaba donkam katkum ka aiñ.
Ïa ki lai ngut kiwei pat la ïoh ban kem da ki BSF ka 50 Bn na West Garo Hills bad kine ki briew ki dei kiba na Pabna, Sherpur bad Kishoreganj District. Kine ki briew ki dei kiba trei kum ki nongsuh jaiñ ha kawei ka karkhana jaiñ ha Ahmedabad, Gujarat bad ki dang wan phai ban leit noh sha Bangladesh.
Ïa kine ki briew la aiti noh sha ki Pulit ka thanat Mahendraganj ban leh ïa kaba donkam katkum ka aiñ.
